حالىقارالىق دامۋ بانكىنەن قارىز نە سەبەپتى تارتىلاتىنى بەلگىلى بولدى
استانا. KAZINFORM - الداعى ۋاقىتتا پارلامەنت ءماجىلىسى «قازاقستان مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى راتيفيكاسيالاۋ تۋرالى» زاڭ جوباسىن تالقىلايدى.
- قارىز تۋرالى كەلىسىم 2024 -جىلعى 12- جەلتوقساندا جاسالعان. كەلىسىمنىڭ ماقساتى - اۋىلدى ەلدى مەكەندەر تۇرعىندارىنىڭ قىزمەت كورسەتىلمەيتىن جانە قىزمەت جەتكىلىكسىز كورسەتىلەتىن اۋداندارىندا جوعارى ساپالى ءارى تۇراقتى كەڭ جولاقتى بايلانىس ينفراقۇرىلىمىنا قول جەتكىزۋدى قامتاماسىز ەتۋ. وسى ورايدا ءماجىلىستىڭ ەكونوميكالىق رەفورما جانە وڭىرلىك دامۋ كوميتەتى زاڭ جوباسى بويىنشا قورىتىندى ازىرلەۋگە دايىن، - دەدى دەپۋتات نۇرتاي سابيليانوۆ ءماجىلىستىڭ جالپى وتىرىسىندا.
ەسكە سالساق، بىلتىر جەلتوقسان ايىندا سەنات قازاقستان ازيا دامۋ بانكىنەن، ازيا ينفراقۇرىلىمدىق بانكىنەن، سونداي-اق حالىقارالىق قايتا قۇرۋ جانە دامۋ بانكىنەن جالپى سوماسى 190 ميلليارد يەنگە جۋىق قاراجات تارتۋعا ارنالعان ءۇش قۇجاتتى ماقۇلدادى.
