حاكان فيدان: رەسەي مەن ۋكراينا اراسىنداعى بايلانىستى رەتتەۋ جولىن تاڭداۋ تاراپتاردىڭ ەركىندە

استانا. KAZINFORM - قازىر ىستانبۇلدا رەسەي مەن ۋكراينا دەلەگاتسيالارى اراسىندا جابىق كەلىسسوزدەر ءوتىپ جاتىر. تاراپتار قاقتىعىستى شەشۋ جولدارىن وزدەرى شەشەدى، دەپ مالىمدەدى تۇركيانىڭ سىرتقى ىستەر ءمينيسترى حاكان فيدان. بۇل تۋرالى Kazinform اگەنتتىگىنىڭ مەنشىكتى ءتىلشىسى حابارلايدى.

نەگىزگى وتىرىس باستالار الدىندا رەسەي دەلەگاتسياسىنىڭ باسشىسى ۆلاديمير مەدينسكي ا ق ش وكىلىمەن بولەك كەلىسسوز جۇرگىزدى. شەتەلدىك باسىلىمداردىڭ جازۋىنشا، مەدينسكي ا ق ش مەملەكەتتىك دەپارتامەنتىنىڭ ساياساتتى جوسپارلاۋ جونىندەگى ديرەكتورى مايكل انتونمەن سويلەسكەن. كەزدەسۋ ناتيجەسى، سونداي-اق ونىڭ كۇن ءتارتىبى جاريالانبادى.

جيىننىڭ اشىلۋ ءسوزىن تۇركيا سىرتقى ىستەر ءمينيسترى حاكان فيدان جاسادى. ول ديالوگقا قاتىسۋشىلار شيەلەنىستى شەشۋ جولىن ءوز بەتىنشە انىقتاۋى ءتيىس ەكەنىن اتاپ ءوتتى.

بۇعان دەيىن تۇركيا كەلىسسوزدەرگە دەلدال رەتىندە قاتىساتىنى حابارلانعان. الايدا تۇرىك وكىلى كىرىسپە سوزدەن كەيىن وتىرىستان شىعىپ كەتتى. بۇل تاراپتاردىڭ كەلىسسوزدەردى نەعۇرلىم تار فورماتتا - بەلسەندى مەدياتسياسىز جۇرگىزۋگە كەلىسىمىن كورسەتەدى.

فيداننىڭ سوزىنەن كەيىن كەلىسسوزدەر باسپا ءسوز بەن سىرتتان باقىلاۋشىلاردىڭ قاتىسۋىنسىز جابىق ەسىك جاعدايىندا جالعاستى. كەزدەسۋ فورماتى قۇپيالىلىقتى قامتاماسىز ەتەدى جانە تاراپتاردىڭ وتكىر ماسەلەلەردى تىكەلەي تالقىلاۋ مۇمكىندىگىن بەرەدى.

باقىلاۋشىلار بۇل راۋندتى سوڭعى جىلدارداعى ماڭىزدى راۋند دەپ باعالادى. الايدا، كەلىسسوز ناتيجەسى بەلگىسىز - دەلەگاتسيالاردىڭ ىمىراعا كەلۋگە دايىندىعىنىڭ دارەجەسى دە سولاي.

ۇزاق ۇزىلىستەن كەيىن رەسەي مەن ۋكراينا اراسىنداعى تىكەلەي ديالوگتىڭ باستالۋىنىڭ ءوزى ىلگەرى قادام ەكەنى اتالىپ وتكەن. الايدا، كەلىسسوزدەردىڭ ناتيجەسىن بولجاۋ ءالى مۇمكىن ەمەس.

ىستانبۇلدا رەسەي مەن ۋكراينا اراسىنداعى تىكەلەي كەلىسسوزدەر باستالدى، دەپ حابارلايدى تۇرىك تەلەارناسى.

بۇعان دەيىن پۋتين ۋكراينامەن كەلىسسوز جۇرگىزەتىن رەسەي دەلەگاتسياسىنىڭ قۇرامىن بەكىتكەنىن جازعانبىز.