فينالعا تاس-ءتۇيىن دايىنبىز – ق ر كوكپار قۇراما كومانداسىنىڭ اعا جاتتىقتىرۋشىسى
استانا. KAZINFORM - ەرتەڭ، «قازانات» يپپودرومىندا قازاقستاندىق كوكپارشىلار قىرعىزستان كوكپار كومانداسىمەن التىن جۇلدە ءۇشىن تالاسادى.
قازاقپارات تىلشىسىنە ق ر كوكپار قۇراما كومانداسىنىڭ اعا جاتتىقتىرۋشىسى وماربەك ەركەباي شاباندوزداردىڭ دايىندىعى تۋرالى ايتىپ بەردى.
«رەسەي كومانداسىمەن كەزدەسىپ، اقتىق سىنعا جولداما الدىق. توپتىق كەزدەسۋلەردە ۇلكەن قارسىلاس بولمادى. بۇگىنگى ويىنعا اسا دايىندىقپەن شىققانبىز. ويتكەنى رەسەي كومانداسىندا ونەر كورسەتىپ جۇرگەندەردىڭ كوبى قىرعىز باۋىرلارىمىز. اتتارى دا قىرعىز ەلىنىڭ اتتارى. ويىن تەڭ دارەجەدە وتەدى دەپ ويلاعانبىز. جالپى وسى كوشپەندىلەر ويىندارىنا تىڭعىلىقتى دايىندالدىق. 5 رەت وقۋ-جاتتىعۋ جيىنىن وتكىزدىك. جىگىتتەرىمىز دە، اتتارىمىز دا ساقاداي ساي، تاس-ءتۇيىن دايىنبىز. ەرتەڭ وسى قۇراممەن قىرعىزستاندىق كوكپارشىلاعا قارسى تۇرىپ، ءبىرىنشى ورىن الۋ ءۇشىن دوداعا تۇسەمىز»، - دەيدى ول.
وماربەك ەركەباي سونىمەن بىرگە ا ق ش-تان كەلگەن كوكپارشىلاردىڭ ويىنى تۋرالى پىكىر ءبىلدىردى.
«امەريكالىق كوكپارشىلار وسىمەن ءۇشىنشى رەت كوشپەندىلەر ويىندارىندا ونەر كورسەتىپ جاتىر. ۇلتتىق سپورتىمىزعا قىزىعۋشىلىق تانىتىپ، ۇيرەنىپ جاتقانى ءۇشىن العىس ايتامىز. ناتيجەسىن وزدەرىڭىز كوردىڭىزدەر. قانشا دەگەنمەن اتا-بابالارىنان كەلە جاتقان قانىندا بار سپورت ءتۇرى بولماعاندىقتان قازاق پەن قىرعىزعا قارسىلاس بولا الادى دەپ ايتا المايمىن»، - دەيدى ق ر كوكپار قۇراما كومانداسىنىڭ اعا جاتتىقتىرۋشىسى.
ايتا كەتەيىك، بۇگىن قازاقستاندىق كوكپارشىلار رەسەيدى 18:2 ەسەبىمەن جەڭىپ، فينالعا وتكەن بولاتىن.
اۆتورريزابەك نۇسىپبەك ۇلى
