فرانسيانىڭ ءىرى كومپانيالارىنىڭ ءبىرى قازاقستانعا بىرلەسكەن كاسىپورىن اشۋدى ۇسىندى
استانا. KAZINFORM - فرانسياعا رەسمي ساپارى بارىسىندا قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ءىرى فرانسۋز كومپانيالارى مەن مەملەكەتتىك قۇرىلىمداردىڭ وكىلدەرىمەن كەزدەستى.
مينيسترلىكتىڭ باسپا ءسوز قىزمەتىنىڭ حابارلاۋىنشا، كەزدەسۋ بارىسىندا سەرىكتەستىكتى دامىتۋ ماسەلەلەرى قاراستىرىلدى.
تالقىلاۋلاردىڭ نەگىزگى باعىتتارى: بۇلتتى تەحنولوگيالار، جاساندى ينتەللەكت (ج ي)، كيبەرقاۋىپسىزدىك، عارىشتى زەرتتەۋ جانە جوعارى جىلدامدىقتى ينتەرنەتكە قولجەتىمدىلىكتى قامتاماسىز ەتۋ. فرانسۋز تاراپى قازاقستاننىڭ سيفرلىق ترانسفورماتسيا سالاسىنداعى جەتىستىكتەرىنە جوعارى باعا بەرىپ، تاجىريبە الماسۋ جانە ىنتىماقتاستىق ورناتۋعا دايىن ەكەندىكتەرىن ءبىلدىردى.
سيفرلىق پلاتفورمالاردى اۆتوماتتاندىرۋ، ماسشتابتاۋ جانە قاۋىپسىزدىككە ارنالعان بۇلتتى شەشىمدەر سالاسىنداعى فرانتسيانىڭ ءىرى كومپانيالارىنىڭ ءبىرى Clever Cloud قازاقستاندىق نارىققا كەڭەيۋگە قىزىعۋشىلىق تانىتىپ، بىرلەسكەن كاسىپورىن اشۋدى ۇسىندى. Clever Cloud قازاقستاندى ءوز قىزمەتتەرىن كەڭەيتۋ ءۇشىن الەۋەتتى سەرىكتەس رەتىندە كورىپ، بۇل قادام ەلدىڭ تەحنولوگيالىق ينفراقۇرىلىمىن كۇشەيتۋگە مۇمكىندىك بەرەدى.
Airbus كومپانياسىمەن وتكەن كەزدەسۋدە عارىش جانە اۆياتسيا تەحنولوگيالارىن دامىتۋعا باسىمدىق بەرىلدى. قازاقستان Airbus شەشىمدەرىن تابيعي رەسۋرستاردى مونيتورينگىلەۋ، ەكولوگيانى باسقارۋ جانە اۆياتسيا سەكتورىن سيفرلاندىرۋ ماقساتىندا پايدالانۋعا قىزىعۋشىلىق تانىتتى. سونىمەن قاتار، Airbus كومپانياسى وزدەرىنىڭ ۇزاق قاشىقتىققا ۇشاتىن Zefir ۇشقىشسىز ۇشۋ اپپاراتىن تانىستىرىپ، بۇل اپپاراتتىڭ سىناقتارىن قازاقستاندا جۇرگىزۋدى ۇسىندى.
Synchrotron Soleil كومپانياسىمەن جۇرگىزىلگەن كەلىسسوزدەر جاساندى ينتەللەكت جانە ۇلكەن دەرەكتەر سالاسىندا عىلىمي ىنتىماقتاستىق مۇمكىندىكتەرىن اشتى. بىرلەسكەن زەرتتەۋ جوبالارى جاساندى ينتەللەكت قولدانۋ ارقىلى ۇلكەن دەرەكتەردى تالداۋعا باعىتتالاتىن بولادى.
Thales كومپانياسىمەن وتكەن كەزدەسۋدە كيبەرقاۋىپسىزدىك پەن تەحنولوگيالىق زەرتتەۋلەر ماسەلەلەرى تالقىلاندى. مينيستر Thales كومپانياسىنىڭ زەرتتەۋ ينستيتۋتىنا ەكسكۋرسيا جاساپ، وندا جاساندى ينتەللەكت، كۆانتتىق ەسەپتەۋلەر جانە چيپتەردى ازىرلەۋگە ەرەكشە نازار اۋداردى. قازاقستان Thales شەشىمدەرىن ماڭىزدى ينفراقۇرىلىمداردى قورعاۋ جانە كيبەرقاۋىپسىزدىك سالاسىنداعى تاجىريبە الماسۋ ارقىلى قاۋىپسىزدىكتى ارتتىرۋعا قىزىعۋشىلىق ءبىلدىردى.
فرانسيانىڭ جاساندى ينتەللەكت جانە سيفرلىق ترانسفورماتسيا ماسەلەلەرى جونىندەگى مەملەكەتتىك حاتشىلىعىمەن بولعان كەزدەسۋدە ەكى ەلدىڭ سيفرلىق ترانسفورماتسياسى بويىنشا تاجىريبە الماسۋ ماسەلەلەرى، ونىڭ ىشىندە GovTech سالاسىنداعى جەتىستىكتەر تالقىلاندى، بۇل سالادا قازاقستان ەداۋىر تابىستارعا جەتكەن. تاراپتار ۇزدىك تاجىريبەلەرمەن الماسۋ ءۇشىن ونلاين- كەزدەسۋ وتكىزۋدى، سونداي-اق كەلەسى جىلدىڭ اقپان ايىندا وتەتىن AI Summit ءىس- شاراسىنا قاتىسۋ جوسپارلارىن تالقىلادى. قازاقستان كەلەسى AI Summit ءىس- شاراسىن استانادا وتكىزۋدى ۇسىندى، سونداي- اق فرانتسۋز تاراپىن جىل سايىنعى Digital Almaty فورۋمىنا قاتىسۋعا شاقىردى.
OneWeb كومپانياسىمەن بولعان كەزدەسۋدە كومپانيانىڭ سپۋتنيكتىك شەشىمدەرىن قازاقستاندا ءتيىمدى شارتتاردا پايدالانۋ مۇمكىندىگى قاراستىرىلدى. OneWeb تەحنولوگيالارىن قاشىقتاعى وڭىرلەردە سيفرلىق تەڭسىزدىكتى جويۋ جانە تسيفرلىق قىزمەتتەرگە قولجەتىمدىلىكتى قامتاماسىز ەتۋ ءۇشىن جوعارى جىلدامدىقتى ينتەرنەتتى تاراتۋدا پايدالانۋ وزەكتى بولىپ تابىلادى.
مينيستر بۇل كەزدەسۋلەر فرانسۋز كومپانيالارى جانە مەملەكەتتىك قۇرىلىمدارمەن ءوزارا ءتيىمدى ىنتىماقتاستىققا بەرىك نەگىز قالايدى دەپ سەنىم ءبىلدىردى. ستراتەگيالىق باعىتتار بويىنشا بىرلەسكەن كۇش- جىگەر - سيفرلاندىرۋ، جاساندى ينتەللەكت جانە كيبەرقاۋىپسىزدىك سالالارى - قازاقستانعا تسيفرلىق ترانسفورماتسيانى جەدەلدەتۋگە، يننوۆاتسيالىق ەكوجۇيەنى دامىتۋعا جانە ازاماتتاردىڭ ءومىر ءسۇرۋ ساپاسىن ارتتىرۋعا مۇمكىندىك بەرەدى.
ايتا كەتەيىك، قازاقستان پرەزيدەنتى قاسىم-جومارت توقايەۆ فرانسيا رەسپۋبليكاسىندا مەملەكەتتىك ساپارمەن ءجۇر. بۇگىن ەليسەي سارايىندا قاسىم- جومارت توقايەۆ پەن فرانسيا پرەزيدەنتى ەممانيۋەل ماكرون كەلىسسوز جۇرگىزەدى.
وسى رەتتە بۇگىن فرانسيانىڭ ايگىلى گيمە مۋزەيىندە «قازاقستان: ۇلى دالا جاۋھارلارى» كورمەسى اشىلدى.
