شىرشا بەزەندىرەمىن دەپ جاراقات العان مۇعالىمگە قانشا الەۋمەتتىك كومەك بەرىلگەنى ايتىلدى

استانا. KAZINFORM — ەڭبەك جانە حالىقتى الەۋمەتتىك قورعاۋ مينيسترلىگى سەمەيدە شىرشا بەزەندىرۋ كەزىندە بيىكتەن قۇلاپ، جاراقات العان قۋات ايتقاليەۆكە قانداي الەۋمەتتىك كومەك تولەنىپ جاتقانىن ءمالىم ەتتى.

Павлодардың орталық алаңында құлап қалған шырша
Фото: pavon.kz

- اباي وبلىسى ءبىلىم باسقارماسىنىڭ سەمەي قالاسى ءبىلىم ءبولىمىنىڭ  49-جالپى ورتا ءبىلىم بەرەتىن مەكتەبىنىڭ جۇمىسكەرى قۋات ايتقاليەۆ 12-جەلتوقساندا 352767 تەڭگە تولىق جالاقىسىن الدى. 21-جەلتوقساندا بولعان جازاتايىم وقيعادان كەيىن جۇمىسكەر ق. ايتقاليەۆكە مەكتەپتىڭ باستاۋىش كاسىپوداق ۇيىمى تاراپىنان 50 مىڭ تەڭگە اقشالاي كومەك كورسەتىلدى، - دەپ جازىلعان Kazinform ساۋالىنا جولدانعان مالىمەتتە.

رەسمي مالىمەتتەن ازىرگە مۇعالىمنىڭ ايلىعى ءجۇرىپ جاتقانىن اڭعارۋعا بولادى.

- وسى قاڭتار ايىندا جۇمىسكەرگە %100 ەڭبەكاقىسى 369893 تەڭگە كولەمىندە بەرىلەدى. ونىمەن قوسا اباي وبلىسىنىڭ ءبىلىم باسقارماسى مەن قازاقستاندىق وقۋ-اعارتۋ، عىلىم جانە جوعارى ءبىلىم قىزمەتكەرلەرىنىڭ سالالىق كاسىپتىك وداعىنا قاراستى اباي وبلىسىنىڭ كاسىپوداق ۇيىمى اراسىنداعى الەۋمەتتىك ارىپتەستىك تۋرالى كەلىسىم شارت نەگىزىندە 10 كۇننەن استام ستاتسيونارلىق نەمەسە امبۋلاتوريالىق ەمدەۋ شىعىندارىنا 15 ا ە ك (59980 تەڭگە) كولەمىندە تولەنەدى. سونداي-اق، دەنساۋلىعىنا بايلانىستى ەڭبەككە ۋاقىتشا جارامسىزدىق كەزەڭىندە %100 جالاقىسى تولەنىپ وتىرادى، — دەلىنگەن مينيسترلىكتىڭ جاۋابىندا.

ەسكە سالساق، 22-جەلتوقساندا سەمەيلىك مۇعالىم شىرشا بەزەندىرۋ كەزىندە اۋىر جاراقات العانى بەلگىلى بولدى.

پرەمەر-ءمينيستردىڭ ورىنباسارى تامارا دۇيسەنوۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا وسى ماسەلەگە بايلانىستى پىكىر بىلدىرگەن بولاتىن.

سوڭعى جاڭالىقتار