شىمكەنتتە رۋسلان بەردەنوۆكە قاستاندىق جاساۋ ءىسى بويىنشا الدىن الا سوت تىڭداۋى اياقتالدى
شىمكەنت. KAZINFORM - قىلمىستىق ءىستى شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قاراپ جاتىر. سوت وتىرىسى بارىسىندا ءبىرقاتار جايتتار جاريا ەتىلدى.
بەردەنوۆتىڭ مۇددەسىن سەنىمدى وكىلى، ادۆوكات قورعاپ وتىر. ول ءىستىڭ سوڭىنا دەيىن سوت پروتسەسىنە قاتىسادى. ايىپتالۋشى ەرنار جيەنباي سوت زالىنا كونۆويمەن جەتكىزىلدى. سوت وتىرىسى باستالماس بۇرىن ول قاتتى قوبالجىعانى بايقالىپ، جارى مەن اناسىنان دەنساۋلىقتارىن سۇراپ، ولاردى جۇباتۋعا تىرىستى.
جيەنباي وزىنە قاتىستى فوتو جانە بەينە تۇسىرىلىمگە تىيىم سالۋدى سۇراپ، بۇل جاعداي ونىڭ وتباسىنا پسيحولوگيالىق تۇرعىدان كەرى اسەر ەتۋى مۇمكىن ەكەنىن العا تارتتى. سوت بۇل ءوتىنىشتى قاناعاتتاندىردى.
ءىستى قاراۋعا ءۇش پروكۋرور، جابىرلەنۋشى تاراپ - شىمكەنت قالاسى اكىمىنىڭ ورىنباسارى رۋسلان بەردەنوۆتىڭ وكىلى، سونداي-اق ءتورت قورعاۋشى قاتىستى. ايىپتالۋشىنىڭ قورعاۋشىلارىنىڭ ءبىرى - ونىڭ تۋعان اكەسى.
مەملەكەتتىك ايىپتاۋشىنىڭ ايتۋىنشا، ەرنار جيەنباي اڭشى مىلتىعىنان بەس رەت وق اتىپ، التىنىشى باقىلاۋ وقتى اتپاق بولعانىمەن، وق-ءدارىسى تاۋسىلعان. ءوز كەزەگىندە ايىپتالۋشى تەرگەۋ بارىسىندا وزىنە قىسىم كورسەتىلىپ، ازاپتاۋ ارەكەتتەرى جاسالعانىن مالىمدەدى. ول سوتقا بۇل تۋرالى دالەلدەر ۇسىنۋعا دايىن ەكەنىن جەتكىزدى.
سوت ءتوراعاسى قارابايەۆ كەلەسى وتىرىستا رۋسلان بەردەنوۆتىڭ سوتقا جەكە قاتىسۋىن قامتاماسىز ەتۋدى تاپسىردى. كەلەسى سوت وتىرىسى 6-تامىز كۇنى ساعات 10:00-گە بەلگىلەندى.
ەسكە سالا كەتەيىك، رۋسلان بەردەنوۆكە قاستاندىق 2024 -جىلدىڭ 21-ساۋىرىندە شىمكەنت قالالىق اكىمدىگى عيماراتى ماڭىندا جاسالعان. قازىر بۇل ىسكە بايلانىستى اۋىر باپتار بويىنشا تەرگەۋ ءجۇرىپ جاتىر.
ول جاراقات الىپ، اۋرۋحاناعا ءتۇستى.
ال 25-ساۋىردە شەنەۋنىككە وق اتقان كۇدىكتىنىڭ اكەسى مالىمدەمە جاسادى.
رۋسلان بەردەنوۆتىڭ اقپان ايىنىڭ سوڭىندا شىمكەنت قالاسى اكىمىنىڭ ورىنباسارى قىزمەتىنە تاعايىندالعان.
اۆتور
قايرات زاينيشەۆ
