12:23, 06 - قاراشا 2024 | GMT +6
شىمكەنتتە كوپىردەن سەكىرمەك بولعان قىزدىڭ ارەكەتى ۆيدەوعا ءتۇسىپ قالدى
شىمكەنت. KAZINFORM - وقيعا ورنىنا جەتكەن ءتارتىپ ساقشىسى بويجەتكەندى قۇتقارىپ، قاۋىپسىز جەرگە الىپ شىقتى.
وقيعا كەشە تۇندە بولعان. كوشە قيىلىسىنداعى كوپىردەن سەكىرگەلى تۇرعان قىزدى كورگەن كەزدەيسوق كۋاگەر بىردەن پوليتسياعا حابار بەرگەن. ءبىر جارىم مينۋت ىشىندە وقيعا ورنىنا جەتكەن پاترۋلدىك پوليتسيا ينسپەكتورى مەيىرجان بارات كوپىر قورشاۋىنا شىعىپ تۇرعان قىزدى بىردەن ۇستاپ الىپ، قاۋىپسىز جەرگە الىپ شىقتى. بۇل ارەكەتتىڭ بارلىعى پوليتسەيدىڭ بەينەجەتونىنا ءتۇسىپ قالعان.
«قۋانىشقا وراي، مەن جاقىن جەردە بولدىم. ۇلگەردىم. بۇل مەنىڭ مىندەتىم»، - دەيدى ءتارتىپ ساقشىسى.
شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى قازىرگى تاڭدا تۇرعىننىڭ ءومىرى مەن دەنساۋلىعىنا قاۋىپ ءتونىپ تۇرعان جوق ەكەنىن ايتتى.
اۆتور
قايرات زاينيشەۆ
