شىمكەنتتە جينالىس كەزىندە انتيكور ۇستاپ اكەتكەن شەنەۋنىك ءىسى سوتقا جولداندى

شىمكەنت. KAZINFORM - شىمكەنتتە قالا اكىمىنىڭ توراعالىعىمەن ءوتىپ جاتقان جينالىس كەزىندە انتيكور قىزمەتكەرلەرى ۇستاپ اكەتكەن تۇرعىن ءۇي باسقارماسى باسشىسىنىڭ مىندەتىن اتقارۋشى ازات مومىنوۆتىڭ ءىسى سوتقا جولداندى.

سول كەزدەگى شەنەۋنىك پەن ونىڭ سىبايلاسىنا قىلمىستىق كودەكستىڭ 189-بابىنىڭ 4-بولىگى 2-تارماعى مەن 218-بابى 3-بولىگى 1,3-تارماقتارى بويىنشا ايىپ تاعىلىپ وتىر.

قالالىق سوتتىڭ مالىمەتىنشە، قىلمىستىق ءىس بويىنشا الدىن-الا تىڭداۋ 12-شىلدە كۇنى ساعات 10:00 گە بەلگىلەندى.

ءىستى قىلمىستىق ىستەر جونىندەگى اۋدانارالىق سوتىنىڭ ءتوراعاسى اينەل وراقبايەۆا قارايدى.

ەسكە سالساق، اقپان ايىندا سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالالىق دەپارتامەنت قىزمەتكەرلەرى اكىمدىكتەگى جينالىس كەزىندە تۇرعىن ءۇي باسقارماسى باسشىسىنىڭ مىندەتىن اتقارۋشى ازات مومىنوۆتى ۇستاپ اكەتكەن بولاتىن.

باسقارما باستىعى سەيسميكالىق قاۋىپسىزدىككە بولىنگەن 120 ميلليون تەڭگەنى جىمقىردى دەپ ايىپتالىپ وتىر.

ۆەدومستۆو مالىمەتىنشە، ول قالانىڭ 216 تۇرعىن ءۇيىنىڭ سەيسميكالىق تۇراقتىلىعىن تەحنولوگيالىق تەكسەرۋ جونىندەگى جۇمىستاردى ورىنداۋعا بولىنگەن اسا ءىرى مولشەردە الدىن الا ءبىر توپ اداممەن ءسوز بايلاسىپ، بيۋجەت قاراجاتىن جىمقىردى دەپ ايىپتالعان.

«زالالدىڭ الدىن سوماسى - 120 ميلليون تەڭگە. قاتارلاس قارجىلىق تەرگەۋ بارىسىندا شەنەۋنىكتىڭ اناسىنا رەسىمدەلگەن تۇركىستان وبلىسىنىڭ قازىعۇرت اۋىلىندا مونشا كەشەنىن سالۋ ارقىلى جىمقىرىلعان قاراجاتتى زاڭداستىرۋ تۋرالى نۇسقاسى تەكسەرىلەدى»، - دەپ مالىمدەگەن بولاتىن قالالىق انتيكور.