شىمكەنتتە اپتاپ ىستىقتان ەلەكتر جەلىلەرى ىستەن شىعىپ، جارىق ءسوندى

شىمكەنت. KAZINFORM - اپتاپ ىستىقتان شىمكەنتتەگى ەلەكتر جەلىلەرىنەن اقاۋ شىعىپ، كەي اۋدانداردا جارىق ءسونىپ قالعان.

قالادا اۋا تەمپەراتۋراسى 43 گرادۋستان اسىپ، ەلەكتر ەنەرگياسىنا سۇرانىس كۇرت وسكەن. بۇل جاعداي جەلىدەگى جابدىقتاردىڭ شامادان تىس جۇكتەلۋىنە جانە بۇزىلۋىنا اكەلدى. سونىمەن قاتار جەراستى كابەل جەلىلەرىنىڭ بۇلىنۋىنە بوگدە ۇيىمداردىڭ كەلىسىلمەگەن جەر قازۋ جۇمىستارى دا سەبەپ بولدى.

«وڭتۇستىك جارىق ترانزيت» كومپانياسى اپاتتى-قالپىنا كەلتىرۋ بريگادالارىن قوسىمشا جۇمىلدىرىپ، جارىق بەرۋ قىزمەتىن تەزىرەك قالپىنا كەلتىرىپ جاتىر.

كومپانيا وكىلدەرى تۇرعىنداردان اتالعان كەلەڭسىز جاعدايعا تۇسىنىستىكپەن قاراۋدى ەسكەرتىپ، قولايسىزدىق ءۇشىن كەشىرىم سۇرادى.

- ەلەكتريكتەر جۇمىسىن كۇشەيتىپ، جارىقتى تۇراقتى جەتكىزۋگە بار كۇشىن سالىپ جاتىر، - دەلىنگەن حابارلامادا.

سينوپتيكتەردىڭ بولجامىنشا، الداعى كۇندەرى اپتاپ ىستىق بىرتىندەپ باسەڭدەيدى. 25-ماۋسىمدا اۋا تەمپەراتۋراسى 26+ گرادۋسقا دەيىن تومەندەپ، بۇلتتى اۋا رايى ساقتالادى، جاۋىن- شاشىن بولمايدى. 26-ماۋسىمدا كۇندىزگى اۋا تەمپەراتۋراسى 28+30+، 27-ماۋسىمدا 30+32+ گرادۋسقا دەيىن كوتەرىلەدى.

ايتا كەتەيىك، بۇدان بۇرىن شىمكەنتتەگى بادام وزەنى جاعاسىندا قۇم مەن قيىرشىق تاس زاڭسىز ءوندىرىلىپ كەلگەنىن جازعان بولاتىنبىز.