شىمكەنتتە 400 گە جۋىق كوشەنىڭ اتاۋى وزگەرتىلمەك

استانا. قازاقپارات - جوبادا اباي، ءال-فارابي، قاراتاۋ، ەڭبەكشى جانە تۇران اۋداندارىنداعى 90 كوشە مەن ءبىر شاعىن اۋداننىڭ اتاۋىن وزگەرتۋ كوزدەلگەن.

شىمكەنتتە 400 گە جۋىق كوشەنىڭ اتاۋىن وزگەرتۋ جانە اتاۋلار بەرۋ ۇسىنىلدى، دەپ حابارلادى Stan.kz سايتى.

شىمكەنت اكىمدىگى «شىمكەنت قالاسىنىڭ كەيبىر قۇرامداس بولىكتەرىنە اتاۋ بەرۋ، قايتا اتاۋ، اتاۋلارىنىڭ ترانسكريپتسياسىن وزگەرتۋ تۋرالى» قالالىق ءماسليحاتتىڭ قاۋلىسى مەن شەشىمىنىڭ جوباسىن جاريالادى. قۇجاتتا قالانىڭ ءبىرقاتار كوشەلەرى مەن شاعىن اۋداندارىنىڭ اتاۋىن وزگەرتۋ، سونداي-اق كەيبىر اتاۋسىز كوشەلەرگە اتاۋ بەرۋ ۇسىنىلادى.

جوبادا اباي، ءال-فارابي، قاراتاۋ، ەڭبەكشى جانە تۇران اۋداندارىنداعى 90 كوشە مەن ءبىر شاعىن اۋداننىڭ اتاۋىن وزگەرتۋ كوزدەلگەن. اتالمىش اۋداندارداعى 290 نان استام اتاۋسىز كوشەلەر مەن ىقشاماۋداندارعا دا اتاۋ بەرۋ جوسپارلانۋدا. ءال-فارابي مەن تۇران اۋداندارىندا التى كوشە اتاۋىنىڭ ترانسكريپسياسى وزگەرەدى.