شىمكەنتتە 151 ادامدى سان سوقتىرعان الاياقتارعا قاتىستى سوت ۇكىمى شىقتى
شىمكەنت. KAZINFORM. شىمكەنت قالاسىنىڭ قىلمىستىق ىستەر جونىندەگى اۋدانارالىق سوتىندا ەلىمىزدىڭ بىرنەشە وڭىرىندەگى جالپى سانى 151 ادامدى سان سوقتىرعان ءۇش ادامعا ۇكىم شىقتى.
ەكى ايەل، ءبىر ەر ادامعا قىلمىستىق كودەكستىڭ 217-بابى 3-بولىگىنىڭ 2-تارماعى، 217-بابى 2-بولىگىنىڭ 1-جانە 4-تارماقتارىمەن ايىپ تاعىلدى.
سوتتىڭ مالىمەتىنشە، سوتتالۋشىلاردىڭ ءبىرى ايەل ازاماتى 2019 -جىلى قىرقۇيەك ايىندا شىمكەنت قالاسىندا «پايىزسىز باسپانا» تۇرعىن ءۇي كووپەراتيۆىن اشىپ، ءوزىن باسشى ەتىپ تاعايىنداعان. ال، 2021 -جىلدىڭ تامىز ايىندا كوپپەراتيۆ سالىمشىلارىنىڭ قاتىسۋىمەن وتكەن جيىندا باسشى رەتىندە سوتتالۋشىنىڭ ەكىنشىسى تاعايىندالعان. سودان كەيىن ول ەكەۋى كووپەراتيۆ وپەراتورىمەن الدىن الا ءسوز بايلاسىپ، 2019-2021 -جىلدار ارالىعىندا Instagram ارقىلى شىمكەنت، الماتى، استانا جانە باسقا دا وبلىستىق ماڭىزى بار قالالاردا سالىمشىلاردان اقشا جيناعان. ول قاراجاتتى قابىلدانعان مىندەتتەمەلەردى قامتاماسىز ەتەتىن كاسىپكەرلىك قىزمەتكە پايدالانباي، سوتتالۋشىلاردىڭ ەكەۋى 135 جابىرلەنۋشىگە 171 ميلليون تەڭگە مولشەرىندە شىعىن كەلتىرگەن. ال، وپەراتور ايەل 16 جابىرلەنۋشىنى 15 ميلليون تەڭگە شىعىنعا باتىرعان.
سوت وتىرىسىندا كووپەراتيۆتى اشقان ايەل كىناسىن تولىق مويىندادى. ونىڭ قورعاۋشىسى سوتتان جاس بالالارىنىڭ بولۋىنا جانە كىناسىن تولىق مويىنداۋىنا بايلانىستى ەڭ تومەن جازا تاعايىنداۋدى سۇرادى.
2021 -جىلى كووپەراتيۆكە باسشى بوپ تاعايىندالعان سوتتالۋشى دا كىناسىن مويىنداپ، بالا كەزىنەن مۇمكىندىگى شەكتەۋلى جان بولعاندىقتان وزىنە باس بوستاندىعىنان ايىرمايتىن جازا تاعايىنداۋدى سۇرادى.
ءۇشىنشى سوتتالۋشى دا كىناسىن مويىنداپ، 10 جابىرلەنۋشى وعان كەشىرىم بەرۋىنە بايلانىستى قورعاۋشىسى ەكەۋى سوتتان باس بوستاندىعىنان ايىرمايتىن جەڭىل جازا بەرۋدى سۇرادى.
سوت ۇكىمىمەن سوتتالۋشىلاردىڭ ەكەۋى قىلمىستىق كودەكستىڭ 217-بابى 3-بولىگىنىڭ 2-تارماعىمەن كىنالى دەپ تانىلدى. كووپەراتيۆتى قۇرىپ، وعان 2019-2021 -جىلدار ارالىعىندا باسشىلىق ەتكەن ايەلگە 6 جىل 8 ايعا باس بوستاندىعىنان ايىرۋ جازاسى تاعايىندالدى. كووپەراتيۆكە 2021 -جىلدان باستاپ باسشىلىق ەتكەن ەر ادامعا 5 جىل 6 ايعا باس بوستاندىعىنان ايىرۋ جازاسى بەرىلدى. ءۇشىنشى سوتتالۋشى ايەل قىلمىستىق كودەكستىڭ 217-بابى 2-بولىگىنىڭ 1-جانە 4-تارماقتارىمەن كىنالى دەپ تانىلىپ، 3 جىلعا باس بوستاندىعىنان ايىرىلدى. سوتتالۋشىلاردىڭ ۇشەۋى دە جازانى قاۋىپسىزدىگى بارىنشا تومەن مەكەمەلەرىندە وتەيدى. سوت ۇكىمى زاڭدى كۇشىنە ەنگەن جوق.
ايتا كەتەيىك، سوتتالۋشىلار قىلمىستى 2019 -جىلدىڭ قىركۇيەگى مەن 2022 -جىلدىڭ قاڭتار ارالىعىندا، ياعني، قىلمىستىق كودەكستىڭ 217-بابى 3-بولىگىنە (قارجىلىق پيراميدا قۇرۋ جانە وعان باسشىلىق ەتۋ) تۇزەتۋلەر ەنگىزىلگەنگە دەيىن جاساعان.
