ايدا بالايەۆا «قازاق فيلم» توڭىرەگىندەگى داۋعا قاتىستى پىكىر ءبىلدىردى

استانا. KAZINFORM - مادەنيەت جانە اقپارات ءمينيسترى ايدا بالايەۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا «قازاقفيلم» مەن «قازاق انيماتسيا» مەكەمەلەرىنىڭ توڭىرەگىندەگى داۋعا پىكىر ءبىلدىردى.

- الەۋمەتتىك جەلىدە ەرلان تولەۋتاي سياقتى كينو ماماندارى باستاعان توپ پەن ءسىزدىڭ اراڭىزدا «قازاق فيلم» جانە «قازاق انيماتسيا» مەكەمەلەرىنىڭ توڭىرەگىندە ايتىس ءجۇرىپ جاتقانىنا ءبىراز بولدى. سول ازاماتتاردى نەگە جەكە قابىلداۋىڭىزعا شاقىرىپ، ۋاجدەرىن تىڭداپ كورمەيسىز؟ «قازاق فيلمنىڭ» قازىرگى باسشىسى قازاق ءتىلىن بىلمەيدى دەگەن سىنعا قالىپ وتىر. باسشىلىقتى اۋىستىرۋ جوسپاردا بار ما، - دەپ سۇرادى ب ا ق وكىلى.

ايدا بالايەۆا «قازاق فيلم» سياقتى مەكەمەنىڭ باسشىسىنا ەڭ ءبىرىنشى كەزەكتە قانداي تالاپتار قويىلاتىنىن ايتتى.

- ەڭ ءبىرىنشى مەنەدجەر باسقارۋ كەرەك. ول جەردە، ناقتى «قازاق فيلمگە قاتىستى ايتىپ وتىرمىن، رەجيسسەر دە، اكتەر دە بولماۋ كەرەك. ناقتى مەنەدجەر بولۋ كەرەك. دۇربەلەڭگە سالىپ جۇرگەن بىرنەشە ادام كەزىندە سول «قازاق فيلمدە» جۇمىس ىستەگەن. ءبىراق «قازاق فيلمنىڭ» وڭتايلى دامۋىنا اسەر ەتەتىندەي جۇمىس ىستەمەگەن. قازىر ولار جوق جەردەن داۋ شىعارىپ ءجۇر. مەن ازامات ساتىبالدى كەتكەننەن كەيىن «قازاق فيلمنىڭ» مەنەدجمەنتىن ءوز باقىلاۋىما الىپ، جۇمىسىنا كۇندەلىكتى نازار اۋدارىپ وتىرامىن. سونىڭ ناتيجەسىندە بۇگىن ءبىز ول مەكەمەنىڭ قارجىلىق كورسەتكىشىن وڭ ناتيجەگە جەتكىزدىك. دەمەك، تابىس تۇسە باستادى. ال تابىس تۇسكەنى دامۋعا مۇمكىندىگى بار ەكەنىن كورسەتەدى. سوندىقتان بۇل جەردە ناتيجەلى جۇمىس ىستەپ جۇرگەن ادامعا «ورىس ءتىلىن بىلمەيسىڭ»، «قازاق ءتىلىن بىلمەيسىڭ» دەپ تيىسە بەرۋ دۇرىس ەمەس دەپ ويلايمىن. مەنىڭ ويىمشا، ولاردىڭ «قازاق فيلم» مولاعا اينالدى» دەگەن سوزدەرى ەشقانداي شىندىققا ساي كەلمەيدى. ءبارىڭىزدى «قازاق فيلمنىڭ» جۇمىسىمەن تانىسۋعا شاقىرامىن، - دەدى ايدا بالايەۆا.

ۆەدومستۆو باسشىسى «قازاق فيلم» باسشىلىعىنا سىن ايتىپ جۇرگەن كينو ماماندارىن داۋ قۋماي، جۇمىس ىستەۋگە شاقىردى.

- ال ول ازاماتتاردى جەكە قابىلداۋ ماسەلەسىنە كەلسەك، بۇل بىتپەيتىن داۋ عوي. ولاردىڭ ءوز اقيقاتى بار، ءبىزدىڭ ءوز اقيقاتىمىز بار. سوندىقتان، مەنىڭ ويىمشا، كەشكە دەيىن داۋ-دامايدىڭ باسىندا جۇرمەي، ناتيجەلى جۇمىس كورسەتۋىمىز كەرەك. ونداي ناتيجە بۇگىندە بار. ونى مەن ماقتانىپ ايتا الامىن، - دەدى مينيستر.

بۇعان دەيىن مينيستر ايدا بالايەۆا «قازاق فيلم» جەرىنىڭ اينالاسىنداعى داۋلى مالىمدەمەلەردى تەرىسكە شىعارعان ەدى.

اۆتور

ەسىمجان ناقتىباي