شىمكەنتتە كۋالىگىنەن ايىرىلعان جۇرگىزۋشى اۆتوبۋس ايداعان

شىمكەنت قالاسىندا «تاسىمالداۋشى» جەدەل-پروفيلاكتيكالىق ءىس-شاراسى ءوتىپ جاتىر.

قالالىق پوليتسيا دەپارتامەنتىنىڭ مالىمەتىنشە، ءىس-شارانىڭ العاشقى تاۋلىگىندە 543 اكىمشىلىك قۇقىق بۇزۋشىلىق انىقتالدى.

- ونىڭ ىشىندە تاكسي قىزمەتىن زاڭسىز ۇسىنۋدىڭ 72 دەرەگى، جولاۋشىلاردى تاسىمالداۋ قاعيدالارىن بۇزۋدىڭ 68 فاكتىسى، قاۋىپسىزدىك بەلدىگىن پايدالانباۋدىڭ 47 دەرەگى جانە تەحنيكالىق تالاپتارعا ساي كەلمەيتىن كولىك قۇرالدارىن پايدالانۋدىڭ 32 فاكتىسى تىركەلدى، - دەلىنگەن پوليتسيانىڭ مالىمەتىندە.

سونىمەن قاتار № 45-باعىتتاعى اۆتوبۋستىڭ جۇرگىزۋشىسى قوعامدىق كولىكتى جۇرگىزۋشى كۋالىگىنسىز باسقارعانى انىقتالدى.

تەكسەرۋ بارىسىندا ونىڭ كولىك قۇرالىن باسقارۋ قۇقىعىنان ايىرىلعانى بەلگىلى بولدى. سوعان قاراماستان ول قوعامدىق كولىكتى باسقارۋىن جالعاستىرعان.

- اتالعان قۇقىق بۇزۋشىلىق بويىنشا زاڭ تالاپتارىنا سايكەس ءتيىستى اكىمشىلىك شارالار قابىلداندى، - دەپ حابارلادى پوليتسيا.

ۆەدومستۆو مالىمەتىنشە، جولاۋشىلار تاسىمالى سالاسىنداعى زاڭدىلىقتى قامتاماسىز ەتۋ ماقساتىنداعى پروفيلاكتيكالىق ءىس-شارالار الداعى ۋاقىتتا دا تۇراقتى تۇردە جالعاسادى.