«شىڭجان - قاشقار» جارمەڭكەسىنە قازاقستاننان 10 كومپانيا قاتىسىپ جاتىر
قىتاي. KAZINFORM - قىتايدا «شىڭجاڭ- قاشقار» ورتالىق جانە وڭتۇستىك ازيا جارمەڭكەسى باستالدى. وعان قىرعىزستان، وزبەكستان، تاجىكستان، اۋعانستان جانە قازاقستان مەملەكەتتەرىنىڭ تاۋار وندىرۋشىلەرى قاتىسىپ جاتىر.
ورتالىق جانە وڭتۇستىك ازيا ەلدەرىنىڭ تاۋار وندىرۋشىلەرىنە ارنالعان قاشقار جارمەڭكەسى بيىل 14 رەت ۇيىمداستىرىلىپ وتىر. اۋقىمدى شاراعا قازاقستان العاش رەت قاتىستى.
«QazTrade» ساۋدا ساياساتىن دامىتۋ ورتالىعىنىڭ باس مەنەدجەرى ءابدىراشيد ۇسەنوۆتىڭ ايتۋىنشا، جارمەڭكە وتاندىق كاسىپكەرلەرگە قىتاي نارىعىنا شىعۋعا مۇمكىندىك بەرەدى.
«قاشقار جارمەڭكەسىنە» اقمولا، سولتۋستىك قازاقستان، باتىس قازاقستان، جەتىسۋ، الماتى وبلىستارىنىڭ كاسىپكەرلەرى قاتىسۋعا نيەت ءبىلدىردى. بارلىعى 10 كومپانيا. بال، كونديتەرلىك ءونىم، جەمىس- جيدەك وندىرۋمەن اينالىساتىن كاسىپورىندار ءوز ونىمدەرىن ۇسىندى. مۇنداي جارمەڭكەلەر ءبىزدىڭ وتاندىق كاسىپكەرلەرگە ەكسپورتقا شىعۋعا جول اشادى»، - دەدى ول.
دەسە دە، قىتاي نارىعىندا ويىپ تۇرىپ ءوز ورنىن العان وتاندىق برەند تە بار.
«تۇيە مەن بيەنىڭ قۇرعاق ءسۇتى قىتايدا جوعارى سۇرانىسقا يە. ءبىز قازاقستاندىق وندىرۋشىمەن بىرلەسىپ جۇمىس ىستەپ جاتقانىمىزعا ءتورت جىلدان استى. وسى ۋاقىت ىشىندە تۇتىنۋشىلار سانى ايتارلىقتاي ارتتى» - دەيدى لي تسزيا ۆەي.
ەسكە سالايىق، شىلدە ايىندا استانادا وتكەن شانحاي ىنتىماقتاستىق ۇيىمىنىڭ ساميتىندە مەملەكەت باسشىسى قازاقستان قىتايعا ەكسپورتتالاتىن استىق كولەمىن 2 ميلليون تونناعا جەتكىزۋگە دايىن ەكەن ايتقان بولاتىن.
سونداي-اق، كەلەسى جىل قىتايدىڭ قازاقستانداعى تۋريزم جىلى بولادى.
