شىعىس قازاقستاندا حالىقارالىق «شىعىس سالبۇرىنى» بۇركىتشىلەر فەستيۆالى وتەدى
وسكەمەن. KAZINFORM - قازان ايىنىڭ 10-14-ارالىعىندا شىعىس قازاقستان وبلىسى ۇلان اۋدانىنىڭ بوزانباي اۋىلىندا ورنالاسقان بۇركىت توبە الاڭىندا ءداستۇرلى حالىقارالىق «شىعىس سالبۇرىنى» بۇركىتشىلەر فەستيۆالى وتەدى.
بۇل تۋرالى ش ق و اكىمىنىڭ ورىنباسارى ەربول نۇرعاليەۆ وڭىرلىك كوممۋنيكاتسيالار قىزمەتىندە وتكەن بريفينگ كەزىندە مالىمدەدى.
«شىعىس سالبۇرىنى» قازاق حالقىنىڭ باي مادەني مۇراسىن جانداندىرىپ، ۇلتتىق سپورت پەن قۇندىلىقتاردى دارىپتەۋ ارقىلى سالاماتتى ءومىر سالتىن ناسيحاتتاۋعا ارنالعان. فەستيۆال شىعىس قازاقستان وبلىسىنىڭ اكىمى ەرمەك كوشەربايەۆتىڭ جانە «رەسپۋبليكالىق قۇسبەگىلىك فەدەراتسياسى» قوعامدىق بىرلەستىگىنىڭ قولداۋىمەن ۇيىمداستىرىلادى.
«شارانىڭ باستى ماقساتى - ۇلتتىق سپورت ارقىلى جاستاردى وتانسۇيگىشتىككە تاربيەلەپ، سالاماتتى ءومىر سالتىن ۇستانۋدى قولداۋ، ۇلتتىق قۇسبەگىلىك سپورتىن، تازى جۇگىرتۋ، اساۋ ۇيرەتۋ ونەرىن كەڭىنەن تاراتۋ. بيىل قازاقستان مەن شەت مەملەكەتتەردەن 5 مىڭعا جۋىق تۋريست كەلەدى دەپ جوسپارلانۋدا، - دەدى ش ق و اكىمىنىڭ ورىنباسارى ەربول نۇرعاليەۆ.
اتاپ ايتقاندا، موڭعوليا، قىتاي، قىرعىزستان، رەسەي جانە ماجارستاننان قاتىسۋشىلار شاقىرىلىپ وتىر. بارلىعى 80 بۇركىت، 30 سۇڭقار جانە 30 تازى جارىسقا تۇسەدى دەپ كۇتىلۋدە.
فەستيۆال اياسىندا ەكى كۇن بويى بۇركىتشىلەردىڭ قۇستاردى جەمگە، ەركىن جانە يەسىنىڭ شاقىرۋىمەن ۇشىرۋ سايىستارى، شىرعامەن قويان جانە تۇلكى اۋلاۋ جارىستارى وتەدى. سونىمەن قاتار جامبى اتۋ، تەڭگە ءىلۋ، تازى يتتەرىنىڭ جارىسى جانە جابايى جىلقىلاردى ۇيرەتۋ سىندى ۇلتتىق سپورتتىق جارىستارى ۇيىمداستىرىلادى.
20 دان استام كيىز ۇيدە قازاق حالقىنىڭ ءداستۇرلى كورمەلەرى قويىلىپ، قوناقتار سىرماق جاساۋ، كەستە تىگۋ، ۇلتتىق تاعام دايىنداۋ بويىنشا شەبەرلىك ساباقتارىنا قاتىسا الادى. اتقا ءمىنۋ، ساداق اتۋ، باعالى سىيلىقتارمەن لوتەرەيا جانە ىستىق تاماق تا فەستيۆال باعدارلاماسىنا ەڭگىزىلگەن.
ءىس-شارانىڭ باستى اقپاراتتىق سەرىكتەستەرى: Jibek Joly تەلەارناسى، Qazsport سپورت ارناسى جانە Zhetysu TV تەلەارناسى.
