شىعىس قازاقستان شەكارا شەبىندەگى اۋىلداردى سپۋتنيكتىك ينتەرنەتكە قوسۋدا قيىندىقتار تۋىندادى
وسكەمەن. KAZINFORM - شىعىس قازاقستان وبلىسىندا شەكارا شەبىندەگى 28 اۋىلدى سپۋتنيكتىك ينتەرنەتكە قوسۋدا قيىندىقتار تۋىندادى.
وبلىس اۋىلدارىن «Starlink» سپۋتنيكتىك ينتەرنەت جۇيەسىنە قوسۋ جۇمىستارى «قولجەتىمدى ينتەرنەت» ۇلتتىق جوباسى اياسىندا جۇرگىزىلۋدە. ءبىرىنشى كەزەكتە ينتەرنەتى مۇلدە جوق نەمەسە جىلدامدىعى تومەن ەلدى مەكەندەر تاڭدالىپ الىنعان. قازىرگى ۋاقىتتا التاي جانە گلۋبوكوە اۋداندارىنداعى بىرنەشە اۋىل مەكتەپتەرى وسى ينتەرنەتكە قوسىلدى.
الايدا رەسەي فەدەراتسياسى مەن قىتاي شەكاراسىنا جاقىن ورنالاسقان اۋىلداردى سپۋتنيكتىك ينتەرنەتكە قوسۋدا قيىندىقتار تۋىندادى. بۇل تۋرالى ش ق و سيفرلاندىرۋ جانە ارحيۆتەر باسقارماسىنىڭ وكىلى ارنۇر ساپارعاليەۆ ءمالىم ەتتى.
«شەكارا شەبىندەگى 28 اۋىلدى ينتەرنەتكە قوسۋ مۇمكىن بولماي تۇر. رەسەي مەن قىتاي «Starlink ءتىڭ» قامتۋ كارتاسىنا كىرمەيدى. سونىڭ سالدارىنان شىعىس قازاقستان وبلىسىنىڭ اتالعان ەلدەردىڭ شەكاراسىنا جاقىن ورنالاسقان ەلدى مەكەندەرىندە سپۋتنيكتىك ينتەرنەت قوسۋ جۇمىستارىنا كەدەرگى كەلدىرۋدە»، - دەيدى ول.
ەسكە سالساق، بيىل ءساۋىر ايىندا شىعىس قازاقستاندا العاش رەت اۋىل مەكتەبى سپۋتنيكتىك ينتەرنەتكە قوسىلعانى حابارلانعان.
