شىڭعىس حان مەن جوشى ۇلىسى بولماعاندا ورتا ازيا حالقى اراب-پارسى ءتىلدى بولۋى مۇمكىن ەدى - دۇكەن ءماسىمحان ۇلى
الماتى. KAZINFORM - الماتىدا ورنالاسقان ۇلتتىق كىتاپحانا زالىندا جوشى ۇلىسىنىڭ 800 جىلدىعىنا ارنالعان «شىعىس دەرەككوزدەرىندەگى قازاق مەملەكەتتىلىگىنىڭ فەنومەنى» اتتى حالىقارالىق عىلىمي- پراكتيكالىق كونفەرەنتسيا ءوتتى. ءىس- شارانى ر. ب. سۇلەيمەنوۆ اتىنداعى شىعىس تانۋ ينستيتۋتى ۇيىمداستىردى.
حالىقارالىق كونفەرەنتسيا بارىسىندا ر. ب. سۇلەيمەنوۆ اتىنداعى شىعىس تانۋ ينستيتۋتىنىڭ ديرەكتورى دۇكەن ءماسىمحان ۇلى جوشى ۇلىسىنىڭ 800 جىلدىعىن اتاپ ءوتۋدىڭ ماڭىزدىلىعىنا توقتالدى.
- مەملەكەت باسشىسى ۇلتتىق قۇرىلتايدىڭ وتكەن جىلعى وتىرىسىندا جوشى ۇلىسىنىڭ 800 جىلدىعىن مەملەكەت كولەمىندە تياناقتى تۇردە اتاپ وتۋگە تاپسىرما بەردى. سونىمەن بيىل جوشى ۇلىسىنىڭ 800 جىلدىعى رەسپۋبليكا كولەمىندە ءوتىپ جاتىر. ءبىراق اتاپ ءوتۋ بۇل - توي تويلاۋ، اس ءىشىپ، اياق بوساتۋ دەگەن ءسوز ەمەس. شىن مانىندە، قازاق حاندىعىنىڭ ءتۇپ تامىرى، باستاۋ كوزى جوشى ۇلىسى ەكەنىن نەگىزدەۋ. ءبىز ارينە، ەشتەڭەنى ويدان شىعارمايمىز، تاريحتىڭ ءوزى سولاي قالىپتاسقان، - دەدى ول.
سونداي-اق، ينستيتۋت باسشىسى شىڭعىس حان مەن جوشى ۇلىسى بولماعاندا ورتالىق ازيا ءوڭىرى مەن حالىقتارى قانداي باعىتتا داميدى دەگەن تاقىرىپتا پىكىر ءبىلدىردى.
- كەيدە زيالى قاۋىم ورتاسىندا شىڭعىس حان تۋرالى داۋ تۋىنداپ جاتادى. ءبىراق ماسەلە، شىڭعىس حاننىڭ قازاق بولعاندىعىنا نە وزبەك، موڭعول، قىرعىز بولعاندىعىندا ەمەس. «ەگەر ول بولماعاندا ورتالىق ازيا قاي باعىتتا داميتىن ەدى، قانداي مادەنيەتپەن ارىپتەلەتىن ەدى» دەگەن ماسەلەدە. مەنىڭشە، شىڭعىس حان بولماعاندا ءبىزدىڭ ورتالىق ازيا ءوڭىرى سول كەزدە قاناتىن كەڭگە جايىپ كەلە جاتقان يسلام ءدىنىنىڭ اۋقىمىنداعى اراب- پارسى ءتىلدى حالىقتاردىڭ مەكەنى بولىپ شىعۋ دا عاجاپ ەمەس ەدى. ال ءبىز ءۇشىن شىڭعىس حاننىڭ ەڭبەگى - ءبىزدىڭ وسى ۇلى دالادا تۇركى حالىقتارى رەتىندە قالىپتاسۋىمىزعا، تۇركى حالىقتارى رەتىندە مەملەكەت قۇرۋىمىزعا نەگىز سالىپ بەردى. اسىرەسە، شىڭعىس حاننىڭ ەكى ۇلىنان تاراعان جوشى ۇلىسى مەن شاعاتاي حاندىعى ءبىزدىڭ بۇگىنگى تۇركى حالىقتارىنىڭ مەملەكەت بولۋىنا نەگىز قالاپ بەردى، - دەپ اتاپ ءوتتى دۇكەن ءماسىمحان ۇلى.
