شىعىن 650 ميلليون تەڭگەدەن اسادى: الاياقتىق جاساپ، ىزدەۋدە جۇرگەن قىلمىسكەرلەر ۇستالدى

استانا. KAZINFORM – ءى ءى م كريمينالدىق پوليتسيا قىزمەتكەرلەرى اسا ءىرى مولشەردە الاياقتىق جاساعانى ءۇشىن حالىقارالىق ىزدەۋدە جۇرگەن قىلمىسكەرلەردى ۇستادى، - دەپ حابارلايدى Polisia.kz.

جابىرلەنۋشىلەرگە كەلتىرىلگەن شىعىن 650 ميلليون تەڭگەدەن اسادى.

- قاراعاندى قالاسىندا 45 جاستاعى ەر ادام قۇرىقتالدى. ول 2018 -جىلدىڭ شىلدەسىندە ءوزى اقتوبەدە بولا وتىرىپ، ەلوردادا جىلجىمايتىن مۇلىك ساتىپ الىپ بەرۋ سىلتاۋىمەن 100 ميلليون تەڭگەنى يەمدەنگەن. الماتى قالاسىندا 44 جاستاعى ايەل ۇستالدى. ول كوكونىستەر مەن جەمىستەردى جەتكىزۋ سىلتاۋىمەن ازاماتتاردى 516 ميلليون تەڭگەدەن استام سوماعا الداعان. استانا قالاسىندا 60 جاستاعى جەرگىلىكتى تۇرعىن ۇستالدى. ول وتكەن جىلدىڭ قىركۇيەك ايىندا جەڭىلدەتىلگەن نەسيە ارقىلى تۇرعىن ءۇي ساتىپ الۋ سىلتاۋىمەن 30 ميلليون تەڭگە جىمقىرعان. سونىمەن قاتار رەسەي فەدەراتسياسىنىڭ ماسكەۋ قالاسىندا 30 جاستاعى قازاقستاندىق ازامات قۇرىقتالدى. ول دا الاياقتىق جولمەن ونداعان ميلليون تەڭگەنى قالتاعا باسقان، - دەدى دەپارتامەنت باستىعى – ءى ءى م رەسمي وكىلى شىڭعىس الەكەشيەۆ.

جالپى قابىلدانعان شارالاردىڭ ناتيجەسىندە جىل باسىنان بەرى پوليتسيا 1360 قىلمىسكەردى ۇستاپ، 1000 نان استام جوعالعان ادامنىڭ ورنالاسقان جەرىن انىقتادى.

بۇعان دەيىن قارجىلىق مونيتورينگ اگەنتتىگى جالعان قۇجات جاساعان اقتوبە وبلىسىنىڭ تۇرعىنىنا ىزدەۋ جاريالاعانىن جازعان بولاتىنبىز.