شەتەلدىك ينۆەستور بوزجىرا شاتقالىنا قوناق ءۇي سالۋعا نيەتتى
اقتاۋ. KAZINFORM - بۇل تۋرالى ماڭعىستاۋ وبلىستىق تۋريزم باسقارماسى حابارلادى. جەرگىلىكتى اكىمدىك ءوڭىردىڭ تۋريستىك الەۋەتىن دامىتىپ، ينۆەستيتسيا تارتۋ باعىتىنداعى جۇيەلى جۇمىستاردى جالعاستىرۋدا.
سونىڭ اياسىندا، وسى جىلى 29 -مامىردا اقتاۋ قالاسىنا جۇمىس ساپارىمەن شەتەلدىك ينۆەستور - «Agalarov Development» كومپانياسىنىڭ نەگىزىن قالاۋشى، ديەۆەلوپەر ەمين اگالاروۆ باستاعان دەلەگاتسيا كەلگەن.
- ءوڭىر اكىمدىگى شەتەلدىك ينۆەستورعا تۋريزم سالاسىنداعى ينۆەستيتسيالىق جوبالاردى ىسكە اسىرۋ ءۇشىن پەرسپەكتيۆالى الاڭداردى تانىستىردى. كەزدەسۋ قورىتىندىسى بويىنشا ينۆەستور وبلىستىڭ تۋريستىك ينفراقۇرىلىمىن دامىتۋعا قىزىعۋشىلىق ءبىلدىردى. كەلىسسوزدەر بارىسىندا تۋريستىك الەۋەتى جوعارى «كەندىرلى» كۋرورتتىق ايماعىنىڭ ماستەر- جوسپارىن ازىرلەۋ باستاماسى تالقىلاندى، - دەلىنگەن حابارلامادا.
ينۆەستور سونىمەن قاتار جوعارى گەولوگيالىق، مادەني جانە ەستەتيكالىق قۇندىلىققا يە بىرەگەي تابيعي نىسان - بوزجىرا شاتقالىندا ەكولوگيالىق تۇرعىدا تۇراقتى قوناق ءۇي سالۋعا قىزىعۋشىلىق تانىتقان.
- جوبانىڭ تۇجىرىمداماسى نىساندى تابيعي لاندشافتقا ۇيلەسىمدى ەتىپ، حالىقارالىق ەكولوگيالىق ستاندارتتار بويىنشا سالۋدى كوزدەيدى. ماستەر- جوسپارلاردى ازىرلەۋ بارىسىندا قورشاعان ورتانى قورعاۋ، انتروپوگەندىك اسەردى ازايتۋ، سونداي- اق جەرگىلىكتى حالىقتىڭ، سالا ساراپشىلارى، ەكولوگتار مەن عىلىمي قاۋىمداستىق وكىلدەرىنىڭ پىكىرلەرىن ەسكەرۋ ماسەلەلەرىنە ەرەكشە نازار اۋدارىلادى. قازىرگى ۋاقىتتا ينۆەستورمەن كەلىسسوزدەر جالعاسىپ جاتىر. اتالعان جوبالار تالقىلانۋ ساتىسىندا، - دەلىنگەن وبلىستىق تۋريزم باسقارماسى تاراتقان حابارلامادا.
