شەتەلدىك تۋريستەردى قازاقستان مەديتسيناسىنىڭ قانداي قىزمەتتەرى قىزىقتىرادى

الماتى. KAZINFORM - الماتىدا قىتايداعى قازاقستان تۋريزم جىلىنىڭ جابىلۋىنا ارنالعان حالىقارالىق فورۋم ءوتتى. ءىس-شارا بارىسىندا قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتس شەتەلدىك تۋريستەردى ەلىمىزدىڭ مەديتسيناسىنىڭ قاي سالالارى قىزىقتىراتىنىن ايتتى.

ونىڭ ايتۋىنشا، الەمدە مەديتسينالىق تۋريزم سالاسى قارقىندى دامىپ كەلەدى.

- بىرنەشە كۇن بۇرىن ءبىز بەيجىڭدەگى مەديتسينالىق تۋريزمنىڭ حالىقارالىق كورمەسىنە قاتىستىق. سوندا قىتاي تاراپىنان ءبىزدىڭ مەديتسينامىز بەن دەنساۋلىق ساقتاۋ جۇيەسىنە ۇلكەن قىزىعۋشىلىق بار ەكەنىن بايقادىق. جىل سايىن مەديتسينالىق تۋريزمنىڭ اۋقىمى ءوسىپ كەلەدى، ورتاشا جىلدىق قارقىنى - %23. بۇل كورسەتكىش ايتىلعان سالانىڭ تۋريزم مەن بيزنەس ءۇشىن وتە پەرسپەكتيۆتى باعىت ەكەنىن كورسەتەدى، - دەدى ول.

سونىمەن قاتار كريستينا كريۆەتس شەتەلدىك تۋريستەردى قازاقستاننىڭ قانداي مەديتسينالىق قىزمەتتەردى قىزىقتىراتىنىن اتاپ ءوتتى. ونىڭ ايتۋىنشا، قازاقستان رەپرودۋكتيۆتى مەديتسينا، ونكولوگيالىق اۋرۋلاردان ەمدەۋ، شاش وتىرعىزۋ قىزمەتتەرى بويىنشا الەم ەلدەرىمەن باسەكەگە تۇسە الادى.

- بۇگىنگى كۇنى مەديتسينالىق تۋريزمدەگى ەڭ تانىمال قىزمەتتەر - بۇل پلاستيكالىق حيرۋرگيا مەن كوسمەتولوگيا. ءبىراق قازاقستان بۇدان بولەك قىزمەتتەردى دە ۇسىنا الادى. ءبىز مەدينيتسالىق قىزمەت العىسى كەلەتىن تۋريستەر ءۇشىن نەگىزگى باعىتتاردى انىقتاۋ ءۇشىن زەرتتەۋ جۇرگىزدىك. ونىڭ ناتيجەسى بويىنشا ەڭ سۇرانىسقا يە باعىت - رەپرودۋكتيۆتى مەديتسينا، ەكومەديتسينا. ءتىپتى، حالىقارالىق كورمە كەزىندە رەپرودۋكتيۆتى مەديتسينا بويىنشا قىزمەت كورسەتەتىن مەكەمەلەرىمىزگە قىزىعۋشىلىق جوعارى ەكەنىن بايقادىق. ودان كەيىن كارديوحيرۋرگيا، نەيروحيرۋرگيا، ونكولوگيالىق اۋرۋلاردى ەمدەۋ باعىتتارى. ءبىز قىتايلىق وپەراتورلارعا استانادا اقپاراتتىق تۋر وتكىزگەن كەزدە ونكولوگيا سالاسىندا قىزىعۋشىلىق بار ەكەنىن بايقادىق. سونداي-اق، ءبىز شاش وتىرعىزۋ بويىنشا ءتيىمدى جۇمىس جۇرگىزە الامىز. قىتاي تاراپىنان ءجيى سۇرالاتىن قىزمەتتەردىڭ ءبىرى وسى. ءبىز مەديتسينالىق تۋريزم ءۇشىن ءجيى تاڭدالاتىن گەرمانيا، تۇركيا، يزرايل، رەسەي سەكىلدى مەملەكەتتەرمەن باسەكەلەسە الامىز، - دەدى كريستينا كريۆەتس.

ەسكە سالايىق، بۇعان دەيىن الماتىدا قىتايداعى قازاقستان تۋريزم جىلى جابىلعانىن جازعانبىز.