شەتەلدىك تۋريستەر ەڭ كوپ باراتىن ەلىمىزدەگى 5 ءوڭىر
استانا. KAZINFORM - الماتى شەتەلدىك تۋريستەردى ەڭ كوپ قابىلدايتىن ەلىمىزدەگى قالالاردىڭ كوشىن باستادى.
2023 -جىلعى 9 ايدىڭ قورىتىندىسى بويىنشا ەلىمىزگە ساياحاتتاعان ىشكى تۋريستەردىڭ سانى %11 عا ارتىپ، شامامەن 5,4 ميلليون ادامعا جەتتى. ونىڭ ىشىندە شەتەلدىك تۋريستەردىڭ سانى - 835 مىڭ ادام. ياعني، ىشكى تۋريستەردىڭ ۇشتەن ءبىرى شەتەلدىكتەردىڭ ۇلەسىنە تيەسىلى. بۇل تۋرالى تۋريزم جانە سپورت مينيسترلىگى ءمالىم ەتتى.
ال سول شەتەلدىك ساياحتاشىلار ەلىمىزدىڭ قاي وڭىرلەرىنە ءجيى ساياحاتتايدى؟ نازارلارىڭىزعا شەتەلدىك تۋريستەردى ەڭ كوپ قابىلداعان ەلىمىزدەگى توپ-5 قالانى ۇسىنامىز.
شەتەلدىك تۋريستەر اراسىندا ەلىمىزدىڭ وڭتۇستىك استاناسى تۋريستىك ءوڭىر رەتىندە كەڭ تانىمال. ماسەلەن، 2023 -جىلعى العاشقى توعىز ايدا الماتىعا 409 394 ادام ساياحاتتاپ كەلگەن. وسىلايشا، الاتاۋ باۋرايىنداعى ارۋ قالا الماتى شەتەلدىك تۋريستەردى ەڭ كوپ قابىلدايتىن ەلىمىزدەگى قالالاردىڭ كوشىن باستادى. الماتى قالاسى شەتەلدىكتەر ءۇشىن تاۋ-شاڭعى كۋرورتتارىمەن، سۇلۋ تابيعاتىمەن، قولايلى اۋا رايىمەن تارتىمدى. جۋىردا ايگىلى يتاليالىق Condé Nast Traveller Italia باسىلىمى الماتىداعى شىمبۇلاق تاۋ شاڭعى كۋرورتىن الەم ساياحاتشىلارى مىندەتتى تۇردە بارۋعا ءتيىس توپ-5 ورىننىڭ ءبىرى رەتىندە ۇسىنسا، امەريكالىق New York Times نۇسقاسى بويىنشا الماتى 2024 -جىلى بارۋعا تۇرارلىق 52 ورىن تىزىمىنە ەنگەن بولاتىن.
ەكىنشى ورىنعا ەل ورداسى - استانا قالاسى جايعاستى. ەلىمىزدىڭ باس قالاسىنا شەتەلدىكتەر ىسكەرلىك تۋريزم بويىنشا ءجيى كەلەدى. 2023 -جىلدىڭ 9 ايىندا استاناعا 220000 شەتەلدىك قوناق كەلگەن. رەيتينگتىڭ ءۇشىنشى ورنىنا ماڭعىستاۋ وبلىسى جايعاستى. قارت كاسپيدىڭ جاعاسىندا ورنالاسقان اقتاۋعا بىلتىرعى قاڭتار- قىركۇيەك ارالىعىندا 34435 شەتەلدىك ساياحاتشىنىڭ تابانى تيگەن.
ۇزدىك بەستىكتىڭ قاتارىنا اتىراۋ وبلىسى مەن شىمكەنت قالاسى ەندى. وتكەن جىلدىڭ العاشقى 9 ايىندا مۇنايلى ولكەگە 24431 شەتەلدىك تۋريست كەلگەن بولسا، ەلىمىزدىڭ ءۇشىنشى مەگاپوليسىنە 20837 شەتەلدىك تۋريست ساياحاتتاعان.
«ەلىمىزدىڭ تۋريستىك الەۋەتى مەن ءداستۇرلى قوناق جايلىعىنىڭ ارقاسىندا قازاقستان شەتەلدىكتەر اراسىندا الەمدەگى ەڭ تانىمال تۋريستىك باعىتتاردىڭ بىرىنە اينالىپ كەلەدى. قازىرگى تاڭدا قازاقستانعا 74 ەلدىڭ وكىلدەرى ۆيزاسىز كەلە الادى. الداعى ۋاقىتتا بۇل كورسەتكىشتى 100 گە دەيىن جەتكىزۋدى جوسپارلاپ جاتىرمىز. بۇدان بولەك، 28 ەلمەن 120 مارشرۋت بويىنشا حالىقارالىق اۋە قاتىناسى جولعا قويىلعان»، - دەدى تۋريزم يندۋسترياسى كوميتەتى ءتوراعاسىنىڭ م. ا. نۇرتاس كارىپبايەۆ.
