شەتەلدىك كومپانيالار استاناداعى قانداي قۇرىلىسقا ينۆەستيسيا قۇيىپ جاتىر
استانا. KAZINFORM - استانا اكىمدىگىندە جەڭىس قاسىمبەكتىڭ باسشىلىعىمەن وڭىرلىك ينۆەستيسيالىق شتابتىڭ وتىرىسى ءوتتى. وندا ەلوردادا وتاندىق جانە شەتەلدىك ينۆەستيسيالىق جوبالاردىڭ قازىرگى مارتەبەسى بويىنشا ماسەلەلەر قارالدى. بۇل تۋرالى ەلوردا اكىمدىگىنىڭ رەسمي سايتى حابارلادى.
ۆيدەوكونفەرەنسيا فورماتىندا تالقىلاۋعا ءىرى شەتەلدىك ينۆەستورلار قاتىستى: تۇرىك كومپانياسى Tiryaki، كاتار حولدينگى Power International Holding، اراب كومپانيالارى International Community Schools Ltd جانە Sabis، اۆستريالىق LASSELSBERGER كومپانياسى، رەسەيلىك WILDBERRIES جانە Ozon ءىرى لوگيستيكالىق كومپانيالارى.
مىسالى، دەنساۋلىق ساقتاۋ سالاسىندا «Power International Holding» كاتارلىق ينۆەستيسيالىق حولدينگى Cynosure كومپانياسىمەن بىرلەسىپ ەلوردادا مەديتسينالىق حاب سالۋ جوباسىن ىسكە اسىرىپ جاتىر. جوبا 2 كەزەڭدە جۇزەگە اسىرىلادى. ءبىرىنشىسى - 196 ميلليون ا ق ش دوللارى (88 ميلليارد تەڭگە) جەكە ينۆەستيسيا سوماسىنا 50 توسەك-ورىنعا ارنالعان مەديتسينالىق ورتالىق سالۋ. ەكىنشى كەزەڭ - شامامەن 360 ميلليون ا ق ش دوللارى (160 ميلليارد تەڭگە) ينۆەستيسيا سوماسىنا مەديتسينالىق حاب قۇرۋدى كوزدەيدى.
وتىرىسقا سونداي-اق، «Sabis» جانە «International Community Schools Ltd» حالىقارالىق مەكتەپتەرىنىڭ قۇرىلىسى بويىنشا جوبالاردى ىسكە اسىراتىن شەتەلدىك ينۆەستورلار قاتىستى. 2800 وقۋشى ورنى مەن مەكتەپكە دەيىنگى 530 ورىنعا ارنالعان «SABIS» اراب برەندىنىڭ حالىقارالىق مەكتەبىنىڭ قۇرىلىسىن وسى جىلدىڭ ءساۋىر ايىندا باستاۋ جوسپارلانىپ وتىر.
سونىمەن قاتار ارابتىڭ International Community Schools Ltd كومپانياسى 1225 وقۋشى ورنى مەن 100 مەكتەپكە دەيىنگى ورىن قۇرا وتىرىپ، حالىقارالىق مەكتەپ سالۋدى جوسپارلاپ وتىر. جوبا 100 دەن استام جۇمىس ورنىن قۇرا وتىرىپ، 9 ميلليارد تەڭگە جەكە ينۆەستيسيا سوماسىنا ەسەپتەلگەن.
تۇركيالىق Tiryaki كومپانياسى قۋاتتىلىعى جىلىنا 240 مىڭ توننا بيداي وڭدەۋ زاۋىتىن سالۋعا شامامەن 200 ميلليون ا ق ش دوللارىن ينۆەستيسيالاۋدى جوسپارلاپ وتىر.
شتاب وتىرىسىنا سونداي-اق «WILDBERRIES» پەن «Ozon» ءىرى رەسەيلىك لوگيستيكالىق كومپانيالارى قاتىستى. «WILDBERRIES» كومپانياسى قۋاتتىلىعى 150 مىڭ شارشى مەتر بولاتىن وڭىرلىك لوگيستيكالىق ورتالىقتىڭ قۇرىلىسىنا شامامەن 50 ميلليارد تەڭگە ينۆەستيسيالايدى، ول 6 مىڭ جۇمىس ورنىن اشادى.
ەلوردادا 40 ميلليارد تەڭگەگە جۋىق جەكە ينۆەستيسيامەن ءىرى «Ozon» لوگيستيكالىق ورتالىعىن سالۋ جوباسى دا جۇزەگە اسىرىلىپ جاتىر. بۇگىنگى تاڭدا 30 مىڭ شارشى مەتر اۋماقتى قۇرايتىن جوبانىڭ ءبىرىنشى كەزەڭى پايدالانۋعا بەرىلدى. 40 مىڭ شارشى مەتر ەكىنشى كەزەگىنىڭ قۇرىلىسى بويىنشا جۇمىستار جۇرگىزىلۋدە. جوبانى جۇزەگە اسىرۋ 5 مىڭنان استام جۇمىس ورنىن قۇرۋدى كوزدەيدى.
اۆستريالىق LASSELSBERGER كومپانياسى يندۋستريالدى پارك اۋماعىندا قۇرعاق قۇرىلىس قوسپالارىن شىعاراتىن زاۋىت سالىپ، 200 دەن استام جۇمىس ورنىن قۇرۋدى جوسپارلاپ وتىر. ينۆەستيسيا كولەمى 25 ميلليارد تەڭگەدەن اسادى. جوسپارلانعان ءوندىرىس كولەمى جىلىنا 100 مىڭ توننا قوسپانى قۇرايدى.
وڭىرلىك ينۆەستيسيالىق شتابتىڭ وتىرىستارى اي سايىنعى نەگىزدە وتكىزىلەتىنىن اتاپ وتكەن ءجون، وندا ءاربىر ىسكە قوسىلعان جوبا مەملەكەتتىك ورگاندار مەن قالالىق قىزمەتتەردىڭ قاتىسۋىمەن جەكە قارالادى. وتىرىستاردى وسى فورماتتا وتكىزۋ ينۆەستورلاردىڭ سۇرانىستارىنا ۋاقىتىلى جاۋاپ بەرۋگە جانە جوبالاردى ىسكە اسىرۋدا بيۋروكراتيالىق كەدەرگىلەردى الىپ تاستاۋعا مۇمكىندىك بەرەدى.
اۆتور
ەلميرا ورالبايەۆا
