شەتەلدەردەگى ەتنيكالىق قازاقتار اراسىندا «اتا جولى» ميگراتسيالىق كارتالارىنا سۇرانىس ارتقان
استانا. KAZINFORM - مەملەكەت باسشىسىنىڭ شەتەلدەن كاسىبي ماماندار مەن تابىستى بيزنەسمەندەردى قازاقستانعا تارتۋ جونىندەگى تاپسىرماسىن ورىنداۋ ماقساتىندا «اتا جولى» كوشى-قون كارتاسى ەنگىزىلگەن بولاتىن. ازىرگە كارتا 55 ادامعا بەرىلگەن. ونىڭ 13 ءى قازىر ەلگە كەلدى.
جوبا اياسىندا تاريحي وتانىنا ورالعاندارمەن ق ر پرەمەر- ءمينيسترىنىڭ ورىنباسارى تامارا دۇيسەنوۆا كەزدەستى. جۇزدەسۋ بارىسىندا قانداستار جوبا تۋرالى پىكىرلەرىن ايتىپ، ەلدە اتقارار جۇمىسىنىڭ جوسپارىن تانىستىردى. ولاردىڭ اراسىندا دەنساۋلىق ساقتاۋ، مۇناي جانە گاز، قۇرىلىس، ءبىلىم بەرۋ، IT سالاسىنىڭ ماماندارى بار.
ماسەلەن، يزرايلدەن كەلگەن بەكجان قوڭىربايەۆ انەستەزيولوگيا قىزمەتىندەگى كەمشىلىكتەردى اتاپ ءوتتى. ول سالاداعى جاعدايدى جاقسارتۋ ءۇشىن شەتەلدىك تاجىريبەنى قولدانۋعا ءازىر ەكەنىن جەتكىزدى.
سايان حابيدەنوۆ قازىر اتىراۋدا زاۋىت سالۋ جونىندەگى حالىقارالىق جوبانى ىسكە اسىرۋعا قاتىسىپ جاتىر. ونىڭ رەسەيدىڭ سۋرگۋت قالاسىندا مۇناي جانە گاز سالاسىندا 13 جىلدىق تاجىريبەسى بار. ەڭبەك جولىن قاتارداعى مامان رەتىندە باستاپ، مانساپ ساتىسىندا ورتا بۋىن باسشىسىنا دەيىن وسكەن. قازىرگى ۋاقىتتا ول ۇزدىك تاجىريبەلەردىڭ قازاقستاندا قولدانىلۋىنا اتسالىسۋدا.
موڭعوليادان كەلگەن حامزا تىلەك - IT - مامان. قازىر استانا- حاب اياسىندا جوبانى جۇزەگە اسىرۋدى جوسپارلاپ وتىر.
بولات ءابىلدين - قۇرىلىس سالاسىنىڭ تاجىريبەلى قىزمەتكەرى. ينجەنەر- قۇرىلىسشى رەتىندە ماسكەۋدە (ر ف) ءبىرقاتار نىسانداردىڭ قۇرىلىسىنا قاتىسقان. ول تاريحي وتانىندا سالانىڭ دامۋىنا ۇلەس قوسسام دەگەن نيەتپەن كەلگەنىن اتاپ ءوتتى. قۇرىلىس مامانداردىڭ بىلىكتىلىگىن ۇدايى جەتىلدىرىپ وتىرۋ قاجەتتىگىنە دە ءمان بەردى. بۇل ىسكە بۇل ىسكە ءوزى دە ارالاسۋعا ءازىر.
تۇركيادان كەلگەن قانداسىمىز شابان دينچتيۋرك قازاقستانعا ءتۇرلى سالادا ينۆەستورلاردى تارتۋعا كۇش سالىپ ءجۇر. كوممۋنالدىق شارۋاشىلىق، مەديتسينا باعىتتارىندا جۇزەگە اسقان جوبالارى تۋرالى ايتىپ وتكەن ول كەلەر جىلى تۋريستىك كومپانيا اشۋدى جوسپارلاپ وتىر. قازاقستانعا جىلىنا كەم دەگەندە 100 مىڭ تۋريست اكەلۋدى ماقسات ەتىپتى.
جۇزدەسۋگە قاتىسقان قانداستارىمىز «اتا جولى» كارتاسىن ەنگىزۋ جوباسىن ۇلكەن قۋانىشپەن قابىلداعانىن جەتكىزدى. وعان شەتەلدەگى وزگە دە ەتنيكالىق قازاقتار قىزىعۋشىلىق ءبىلدىرىپ جاتقانىن ايتتى.
«ۇكىمەت «اتا جولى» كارتاسىن پايدالانعىسى كەلەتىندەرگە قولداۋ كورسەتۋگە دايىن. سىزدەردىڭ ۇسىنىستارىڭىز بويىنشا جوبانى جەتىلدىرۋگە قاتىستى ءتيىستى مەملەكەتتىك ورگاندارعا تاپسىرمالار بەرىلەتىن بولادى. قازاقستاننىڭ دامۋىنا قولدان كەلگەنشە ۇلەس قوسۋعا دەگەن نيەتتەرىڭىز قۋانتادى. بۇل رەتتە ەلىمىزدە ءتۇرلى سالالىق باعدارلامالار جۇزەگە اسىپ جاتقاندىعىن اتاپ وتكىم كەلەدى. ولاردى جۇزەگە اسىرۋدا سىزدەردىڭ تاجىريبەلەرىڭىز كادەگە جارايدى دەپ سانايمىن»، - دەپ اتاپ ءوتتى تامارا دۇيسەنوۆا.
ايتا كەتەيىك، «اتا جولى» كارتاسى شەتەلدە تۇرىپ جاتقان ەتنيكالىق قازاقتارعا 10 جىلعا دەيىنگى مەرزىمگە بەرىلەدى. وعان قول جەتكىزۋ ءۇشىن ۇمىتكەر كەلەسىدەي تالاپتاردىڭ بىرىنە ساي بولۋى شارت:
- ق ر ازاماتتىعىنا قابىلداۋدىڭ وڭايلاتىلعان ءتارتىبى بەلگىلەنەتىن ادامدار ءۇشىن ماماندىعىنىڭ بولۋى؛
- قازاقستاندا سۇرانىسى جوعارى ماماندىققا يە؛
- تۇراقتى تۇراتىن نەمەسە ازاماتتىعى بار ەلدە تىركەلگەن، جۇمىس ىستەپ تۇرعان كاسىبىنىڭ بولۋى.
كارتا يەسى قازاقستاندا جۇمىسقا ورنالاسۋ نەمەسە كاسىبىن جۇرگىزۋ، الەۋمەتتىك تولەمدەر جاساۋ، كەپىلدەندىرىلگەن مەديتسينالىق كومەككە قول جەتكىزۋ، ءبىلىم الۋ جانە ت. ب. قىزمەتتەردى پايدالانا الادى. الايدا مەملەكەتتىك قىزمەتتە جۇمىس اتقارۋعا، جەرگىلىكتى ءوزىن- ءوزى باسقارۋ ورگاندارىنا سايلانۋعا، رەسپۋبليكالىق رەفەرەندۋمعا قاتىسۋعا نەمەسە داۋىس بەرۋگە حاقى جوق.
جوبا بىلتىردان باستاپ جۇزەگە اسىپ كەلەدى. بۇگىنگە دەيىن 250 ادام 18 مەملەكەتتەگى ەلشىلىكتەرىمىزگە كەلىپ، كەڭەس الىپتى. كارتا الۋعا «قۇتتى مەكەن»، «E- Qonaq» موبيلدى قوسىمشالارى ارقىلى ءوتىنىش بەرۋگە بولادى نەمەسە قازاقستاننىڭ شەتەلدەردەگى ەلشىلىكتەرىنە جۇگىنۋ قاجەت.
