شەتەلدەن اكەلىنگەن 60 توننا قىزاناقتان ۆيرۋس تابىلىپ، كەرى قايتارىلدى

تۇركىستان. KAZINFORM - شەكارادان قاتەرلى ازىق-تۇلىكتى وتكىزبەۋگە اۋىل شارۋاشىلىعى مينيسترلىگى اگروونەركاسىپ كەشەنىندەگى مەملەكەتتىك ينسپەكسيا كوميتەتى جاۋاپتى. بيىل كوميتەت تۇركىستان وبلىسىندا وسىنداي زارارلى 60 توننا ءونىمدى انىقتاعان.

بيىل تۇركىستان وبلىسىنداعى قازاق- وزبەك شەكاراسى ارقىلى شەت مەملەكەتتەردەن 1075 اۆتوكولىككە تيەلگەن 15637 توننا قىزاناق ءونىمى يمپورتتالعان.

ال فيتوسانيتاريا تالابىنا (فيتوسانيتاريالىق سەرتيفيكاتى جوق، تاڭباسى جوق) ساي كەلمەيتىن 8 كولىككە تيەلگەن 29,522 توننا قىزاناق ءونىمى ءوز ەلىنە كەرى قايتارىلعان.

سونىمەن قاتار، ءونىمنىڭ جاسىرىن زارار جۇقتىرعانىن انىقتاۋ ماقساتىندا شەتەلدەن اكەلىنگەن قىزاناق، بايالدى، ءتاتتى بۇرىشتىڭ ءاربىر پارتياسىنا ءتيىستى كارانتيندىك فيتوسانيتاريا ساراپتاماسى (پ ت ر) جاسالعان.

ناتيجەسىندە تۇرىكمەنستان رەسپۋبليكاسىنان اكەلىنگەن - 56,1 توننا، وزبەكستان رەسپۋبليكاسىنان - 4,2 توننا قىزاناقتان «قىزاناق جەمىسىنىڭ قوڭىر قاتپارلى ۆيرۋسى» تابىلعان.

ونىمدەردى كىرگىزۋگە تىيىم سالىنىپ، كەلگەن جاعىنا قايتارىلدى.

بۇدان بولەك، جىل باسىنان بەرى فيتوسانيتاريالىق باقىلاۋ بەكەتتەرىندە تالاپقا ساي كەلمەيتىن 497,624 توننا كارانتينگە جاتقىزىلعان ءونىم كەرى قايتارىلعان.

اۆتور
جانات قاپالبايەۆا