شەتەل ازاماتى قىزىن تابۋعا كومەكتەسكەن ۇلتتىق ۇلاننىڭ قىزمەتكەرلەرىنە العىس ايتتى

استانا. KAZINFORM - ق ر ءى ءى م ۇلتتىق ۇلاننىڭ اسكەري قىزمەتشىلەرى V دۇنيەجۇزىلىك كوشپەندىلەر ويىنىن تاماشالاۋعا كەلىپ، قىزىن جوعالتىپ العان تۇرىك ەلىنىڭ ازاماتىنا كومەكتەستى.

Polisia.kz-تىڭ حابارلاۋىنشا، وقيعا 8-قىركۇيەكتە ەتنواۋىل قالاشىعىندا بولعان. كىشى سەرجانت راۋان يمانبەرديەۆ پەن ەفرەيتور نۇردوس ماناس قاراۋسىز قالعان، جىلاپ تۇرعان قىزدى بايقاپ قالعان. دەرەۋ اتا-اناسىنا ىزدەۋ سالعان اسكەري قىزمەتشىلەر كوپ ۇزاماي قىز بالانىڭ اكەسىن تاپتى.

ايتا كەتسەك، 8-13-قىركۇيەك ارالىعىندا وتكىزىلىپ جاتقان اۋقىمدى ءىس-شارادا قاۋىپسىزدىكتى قامتاماسىز ەتۋ - باستى نازاردا. ىشكى ىستەر ورگاندارى قىزمەتكەرلەرى قالا تۇرعىندارى مەن قوناقتاردىڭ تىنىشتىعىن ساقتاۋ ماقساتىندا كۇشەيتىلگەن رەجيمدە قىزمەت ەتىپ جاتىر.

ەسكە سالا كەتەيىك، بۇعان دەيىن استانادا دۇنيەجۇزىلىك كوشپەندىلەر ويىندارىنىڭ سالتاناتتى اشىلۋ ءراسىمى باستالعانىن جازعان ەدىك.