شەرزات سوتى: پروكۋرور ايىپتالۋشىلارعا 7-23 جىل اراسىندا جازا سۇرادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 16 جاستاعى شەرزات پولاتتىڭ ولىمىنە بايلانىستى سوت وتىرىسىندا جارىس ءسوز ءوتىپ جاتىر.

ءىس بويىنشا ايىپتالۋشىلار ورنىندا 9 ادام وتىر. مەملەكەتتىك ايىپتاۋشى دانا سارسەنباي ايىپتالۋشى ابزال شىناسىلعا 23 جىل، ال راۆيل ساكيەۆكە 20 جىل جازا تاعايىنداۋدى سۇرادى. سوتتالۋشىلار دارحان اسكەنتاي، نۇربول توقتاۋبايەۆ، شىڭعىس بەلعوجايەۆ، ديدار قالياحمەتكە 7 جىل، نۇرقياس ءىلياسوۆقا وتەلمەگەن جازانى ءىشىنارا قوسۋ ارقىلى تۇپكىلىكتى 9 جىل، ازامات توقتاۋبايەۆقا وتەلمەگەن جازانى ءىشىنارا قوسۋ ارقىلى تۇپكىلىكتى 15 جىل، دۋمان ىسقاققا 1 جىل 6 اي جازا سۇرادى.

ايىپتالۋشىلارعا كەلەسىدەي ايىپ تاعىلعان:

- ابزال شىناسىل قىلمىستىق كودەكستىڭ 293-بابى 3-بولىگى (بۇزاقىلىق)، 99-باپ 2-بولىگى 5، 9، 14-تارماقتارى (ادام ءولتىرۋ)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 1، 7، 9-تارماقتارى.

- راۆيل ساكيەۆ قىلمىستىق كودەكستىڭ 293-بابى 3-بولىگى (بۇزاقىلىق)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 1، 7، 9-تارماقتارى (ادام ءولتىرۋ)؛

- شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ قىلمىستىق كودەكستىڭ 293-بابى 3-بولىگى (بۇزاقىلىق) .

- ازامات توقتاۋبايەۆ قىلمىستىق كودەكستىڭ 188-بابى 1-بولىگى (بوتەننىڭ مۇلكىن جىمقىرۋ).

- كامەلەتكە تولماعان ديدار ىسقاق قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلىپ وتىر.

العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.

بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.

2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات اعاسىنىڭ دەنەسى تابىلدى.

اۆتور

دوسبول اتاجان