شەنەۋنىك جەتىم بالالاردىڭ قۇقىعىن بۇزعانى ءۇشىن سوت الدىنا كەلدى
استانا. KAZINFORM - ماڭعىستاۋ وبلىسىندا شەنەۋنىك جەتىم بالالارعا قاتىستى مىندەتتەرىن ادال ورىنداماعانى ءۇشىن سوت الدىندا جاۋاپ بەردى.
ءىس ماتەريالدارىنا سايكەس وبلىستىڭ اۋداندىق ءبىلىم بولىمدەرىنىڭ ءبىرىنىڭ باسشىسى زاڭ تالاپتارىن ورىنداماعان جانە ۋاقىتىندا جەتىم بالالار مەن اتا-انا قامقورلىعىنسىز قالعان بالالار تۋرالى مالىمەتتەردى رەسپۋبليكالىق دەرەكتەر بازاسىنا ەنگىزبەگەن.
سوت وتىرىسىندا مەملەكەتتىك قىزمەتكەر كىناسىن تولىق مويىنداپ، ىستەگەن ىسىنە وكىندى جانە سوتتان ەڭ جەڭىل جازا تاعايىنداۋدى سۇرادى.
اۋداندىق ءبىلىم ءبولىمىنىڭ باسشىسى ا ق ب ت ك- ءنىڭ 135-بابى 1-بولىگى 1-تارماعى بويىنشا، ياعني «جەتىم بالالار مەن اتا-انا قامقورلىعىنسىز قالعان بالالار تۋرالى مالىمەتتەردى رەسپۋبليكالىق دەرەكتەر بانكىنە ۇسىنۋ ءتارتىبىن جانە مەرزىمىن بۇزۋ» بابى بويىنشا كىنالى دەپ تانىلدى. وعان 30 ا ە ك (110760 تەڭگە) مولشەرىندە ايىپپۇل تۇرىندەگى جازا تاعايىندالدى.
ەسكە سالايىق، بۇعان دەيىن ماڭعىستاۋ وبلىسىندا پروكۋرورلاردىڭ ىقپالىمەن جەتىم بالالار تۇرعىن ءۇي كەزەگىنە قويىلعانى حابارلانعان بولاتىن.
جاڭاوزەن قالاسىنىڭ پروكۋراتۋراسىمەن جۇرگىزىلگەن تالداۋ بارىسىندا اتا- اناسىنىڭ قامقورلىعىنسىز قالعان 38 جەتىم بالالاردىڭ تۇرعىن ءۇي كەزەگىنە قويىلماعانى انىقتالدى.
