شەكتەن تىس ساۋدا جاساۋ ميعا زيان كەلتىرەدى

عالىمدار جاستار اراسىنداعى كومپۋلسيۆتى شوپپينگ (شەكتەن تىس ساۋدا جاساۋ) پەن مي قىزمەتىنىڭ بايلانىسىن انىقتادى. Applied Neuropsychology: Adult جۋرنالىندا جاريالانعان زەرتتەۋگە سايكەس، كومپۋلسيۆتى شوپپينگككە اۋەس ادامداردىڭ ءوز ەموتسيالارىن جانە ءىس-ارەكەتتەرىن باسقارۋ قابىلەتى ءالسىز بولىپ كەلەدى. 

زەرتتەۋگە 18 بەن 48 جاس ارالىعىنداعى 205 ادام قاتىستى. ونىڭ ىشىندە، 42 ادام كومپۋلسيۆتى شوپپينگكە بەيىم ەكەنى انىقتالدى، ولاردىڭ 39 ى ايەلدەر. بۇل توپتىڭ باستى قيىندىعى - يمپۋلستاردى تەجەۋ قابىلەتىنىڭ تومەندىگى. ياعني، ولار توقتاپ، ويلانۋدىڭ ورنىنا، وزدەرىن ساۋدا جاساۋعا ماجبۇرلەيدى.

كومپۋلسيۆتى شوپپينگتىڭ نەگىزگى سەبەپتەرى رەتىندە ەموتسيانى رەتتەي الماۋ، ءوزىن-ءوزى تومەن باعالاۋ جانە الەۋمەتتىك قىسىم اتالدى. اسىرەسە، سترەسس، مازاسىزدىق نەمەسە ءىش پىسىپ وتىرعان كەزدە ساۋدا جاساۋدى قالاعاندار ۋاقىتشا جەڭىلدىك سەزىنەدى. ءبىراق، كوپ ۇزاماي، ولاردى قارجىلىق قيىندىقتار مەن وكىنىش سەزىمى باسادى.

عالىمدار كومپۋلسيۆتى شوپپينگتىڭ قاۋىپتى سالدارى رەتىندە قارجىلىق قيىندىقتاردى، جاقىندارىمەن قارىم-قاتىناستىڭ بۇزىلۋىن جانە ەموتسيونالدىق كۇيزەلىستى اتاپ ءوتتى. سونىمەن قاتار، بۇل قۇبىلىس دەپرەسسيا، مازاسىزدىق جانە تاۋەلدىلىك سياقتى باسقا پسيحيكالىق بۇزىلىستارمەن دە بايلانىستى بولۋى مۇمكىن.

زەرتتەۋ ناتيجەلەرى مي قىزمەتىنىڭ بۇزىلىستارى مەن شوپپينگكە تاۋەلدىلىك اراسىنداعى بايلانىستى كورسەتتى، ءبىراق بۇل ماسەلەنىڭ ناقتى سەبەپتەرى ءالى دە تولىق انىقتالعان جوق.