ۇشكەمپىروۆ: ءشامىلدىڭ ءسوزى بولماعاندا وليمپيادا چەمپيونى بولماس ەم

استانا. قازاقپارات - دزيۋدوشى ەلدوس سمەتوۆ وليمپيادا چەمپينى بولعان سوڭ، جاقسىلىق ۇشكەمپىروۆتەن كەيىن 44 جىلدان سوڭ قايتالانعان ەرلىك دەپ، كوبى تاريح بەتتەرىن پاراقتاپ كەتتى. 80-جىلى التىن العان پالۋان ءشامىل سەرىكوۆ تۋرالى دا ايتىلا باستادى. جەلىدە ەندى جاقسىلىق ۇشكەمپىروۆتىڭ ءشامىلدىڭ ارقاسىندا قالاي جەڭىسكە جەتكەنى تۋرالى ەستەلىگى كەڭ تاراپ جاتىر.

جاقسىلىق ۇشكەمپىروۆ ءبىر سۇحباتىندا وليمپياداداعى ءاربىر كۇرەس وڭايعا سوقپايتىنىن ايتقان.

«كەزەكتى قارسىلاستىڭ ءبىرىن باسىندا جەڭىپ كەلە جاتقانىممەن، ارتىنشا ادىستەرىم وتپەي، ول باسىم بولا باستادى. ىشتەي ءىستىڭ قيىنعا اينالىپ بارا جاتقانىن سەزىپ تۇرمىن. اينالا شۋ، ايقايلاعان ادام. بۇندايدا ترەنەرىڭدى دە ەستۋ قيىن. ءبىر كەزدە ءشامىلدىڭ داۋسىن ەستىدىم»، - دەپتى ۇشكەمپىروۆ.

سول كەزدە ول ءشامىل سەرىكوۆتىڭ «تۇيە قۇساپ شايقا، تۇيە قۇساپ شايقا» دەگەن قازاقشا ءسوزىن ەستىگەنىن ايتقان.

«ءشامىلدىڭ داۋسىن جازباي تانىدىم. جانە ونىڭ نە ايتىپ جاتقانىن دا ءتۇسىندىم. سونشا ايقايدىڭ اراسىنان قازاقتىڭ ءسوزى، قازاقتىڭ داۋسى قۇلاعىما انىق جەتتى. قارسىلاسىمدى ەكى قولىنان الىپ شايقادىم. كەرى شەگىنگەنىندە ەكى-ءۇش ءادىستى قاتار جاساپ، ۇپايىمدى ارتتىرىپ الدىم. ارى قاراي كۇرەسىم ءجۇرىپ كەپ بەردى. ءشامىل حاس تالانت قوي. كۇرەستى سىرتىنان باقىلاپ تۇرىپ، ەڭ كەرەك ساتتە، ەڭ كەرەك كەڭەستى بەردى. ەگەر سول ءسوزى بولماعاندا، مەنىڭ وليمپيادا چەمپيونى بولماي قالۋىم دا ابدەن مۇمكىن ەدى»، - دەپتى ۇشكەمپىروۆ.

ايتا كەتسەك، ۇشكەمپىروۆپەن قاتار التىن العان قازاق پالۋانى ءشامىل سەرىكوۆ 1989 -جىلى 22-قاراشادا ءوز-وزىنە قول جۇمساپ، دۇنيەدەن وتكەن. بالۋان، گرەك-ريم كۇرەسىنەن الەم جانە وليمپيادا چەمپيونى (1980)، ك س ر و-نىڭ ەڭبەك سىڭىرگەن سپورت شەبەرى (1979) 1956 -جىلى الماتى قالاسىندا دۇنيەگە كەلگەن.

 Ulysmedia.kz