شەكارا ماڭىندا جۇمىس ىستەيتىندەر ايلىعىنا 50 پايىز ۇستەمەاقى قوسىلۋى مۇمكىن
استانا. KAZINFORM - شەكارادان 50 شاقىرىم قاشىقتىقتا جاتقان ەلدى مەكەندەردە جۇمىس ىستەيتىن ازاماتتاردىڭ ايلىعىنا 50 پايىز ۇستەماقى قوسىلىپ، ەڭبەك ءوتىلى وزگەشە ەسەپتەلۋى مۇمكىن. ۇلتتىق ەكونوميكا مينيسترلىگى Kazinform ساۋالىنا وسىنداي جاۋاپ ۇسىندى.

- حالىقتىڭ كوشى-قون اعىنىن ازايتۋ جانە ەڭبەگى ارتىق وڭىرلەردەن ەڭبەك ميگرانتتارىن تارتۋ ماقساتىندا ەڭبەك تاپشىلىعى بار وبلىستاردىڭ شەكارالاس ەلدى مەكەندەرىندە جانە ەكسترەمالدى تابيعي-كليماتتىق جاعدايلارى بار (جىلىتۋ ماۋسىمى 9 ايعا سوزىلاتىن) ەلىمىزدىڭ سولتۇستىك جانە شىعىس وڭىرلەرىنىڭ جانە باتىس ءوڭىرىنىڭ جەكەلەگەن اۋداندارىندا (مەملەكەتتىك شەكارادان 50 ك م دەيىنگى قاشىقتىقتا ورنالاسقان) شالعاي شەكارا ماڭىنداعى اۋىلدىق وكرۋگتەردىڭ تۇرعىندارى ءۇشىن ۋاكىلەتتى مەملەكەتتىك ورگاندار جالاقىسىنا 50 پايىزعا دەيىن ۇستەمەاقى قوسۋ جانە ەڭبەك ءوتىلىن ەسەپتەۋدىڭ ەرەكشە نورمالارىن جۇرگىزۋ جانە ت. ب. ماسەلەلەر پىسىقتالىپ جاتىر، - دەپ جازىلعان رەسمي مالىمەتتە.
ۆەدومستۆونىڭ دەرەگى بويىنشا شەكارادان 50 شاقىرىم قاشىقتىقتا ورنالاسقان 1300 گە جۋىق ەلدى مەكەن بار.
- قازىرگى ۋاقىتتا ەلىمىزدىڭ 14 وبلىسى رەسەي فەدەراتسياسىمەن، قىتاي حالىق رەسپۋبليكاسىمەن، وزبەكستان، قىرعىزستان جانە تۇرىكمەنستان اۋماقتارىمەن شەكتەسەدى.
تىكەلەي شەكارا ماڭى بەلدەۋىندە مەملەكەتتىك شەكارادان 50 ك م دەيىنگى قاشىقتىقتا 1,7 ميلليون ادام تۇراتىن 1283 شەكارا ماڭىنداعى اۋىلدىق ەلدى مەكەن ورنالاسقان، - دەلىنگەن جاۋاپتا.
رەسمي مالىمەتكە سۇيەنسەك، كەيىنگى ون جىلدىڭ ىشىندە قازاقستان كارتاسىنان 572 اۋىل جويىلعان. الداعى 3 جىلدا ولاردىڭ قاتارىنا تاعى 546 اۋىل قوسىلۋى مۇمكىن.