شاتىردا سايرانداعان جاس وسپىرىمدەر: تەلەفوندارىنان قاۋىپتى ويىن تابىلعان جوق

استانا. KAZINFORM - ەلوردادا كوپقاباتتى ءۇيدىڭ شاتىرىندا جۇرگەن 7 جاس ءوسپىرىم انىقتالىپ، ولاردىڭ زاڭدى وكىلدەرى اكىمشىلىك جاۋاپكەرشىلىككە تارتىلدى. بۇل تۋرالى استانا قالالىق پوليتسيا دەپارتامەنتىنەن ءمالىم ەتتى.

ۆەدومستۆو مالىمەتىنشە، پوليتسياعا كوپقاباتتى ءۇيدىڭ شاتىرىندا قىز بالانىڭ جۇرگەنى تۋرالى حابارلاما تۇسكەن. وقيعا ورنىنا كەلگەن قۇقىق قورعاۋشىلار 7 جاسءوسپىرىمدى ۇستاعان.

«جاسوسپىرىمدەر شاتىرعا كوتەرىلەتىن ەسىكتىڭ اشىق تۇرعانىن كورىپ، توبەگە شىعۋعا شەشىم قابىلداعانى انىقتالدى. ولاردىڭ زاڭدى وكىلدەرىنىڭ كوزىنشە موبيلدى قۇرىلعىلارى تەكسەرىلىپ، قاۋىپتى ويىندارعا قاتىسۋ فاكتىسى انىقتالعان جوق. بالالارعا دۇرىس باقىلاۋ جاساماعانى ءۇشىن ولاردىڭ زاڭدى وكىلدەرى ق ر اكىمشىلىك قۇقىق بۇزۋشىلىق تۋرالى كودەكستىڭ 435-بابىمەن اكىمشىلىك جاۋاپكەرشىلىككە تارتىلدى. سونىمەن قاتار پوليسيا قىزمەتكەرلەرى الداعى ۋاقىتتا مۇنداي وقيعالارعا جول بەرمەۋ ءۇشىن تۇرعىن ءۇي كەشەندەرى مەن ۇيلەردىڭ شاتىرىنا شىعاتىن ەسىكتەردى جابۋعا باعىتتالعان ءىس-شارالار قابىلداپ جاتىر»، - دەپ اتاپ وتەدى دەپارتامەنتتەن.

وسى ورايدا پوليسيا ينتەرنەت پەن الەۋمەتتىك جەلى ارقىلى قاۋىپتى ءىس-ارەكەتتەرگە تارتۋ قاتەرىنىڭ ارتىپ تۇرعانىنا بايلانىستى اتا-انالاردى بالالارىنىڭ قاۋىپسىزدىگىنە ءجىتى باقىلاۋ جاساۋعا شاقىرادى.

الەۋمەتتىك جەلىدە بالالاردى قاۋىپتى ءىس-ارەكەتتەرگە يتەرمەلەيتىن ويىن تاراپ جاتقانىن جازعان بولاتىنبىز.