ش ى ۇ سامميتىنە كەلگەن مەيماندار كوشپەندىلەر ويىندارىمەن تانىستى
استانا. KAZINFORM - استانا سامميتىنە شاڭحاي ىنتىماقتاستىق ۇيىمىنا مۇشە ەلدەردەن كەلگەن مەيماندار مەن ب ا ق وكىلدەرىنە كۇزدە ەلوردادا وتكەلى وتىرعان V دۇنيەجۇزىلىك كوشپەندىلەر ويىندارى تانىستىرىلدى.
شەتەلدىك دەلەگاتتار اراسىندا گەرمانيا، ءۇندىستان، يسپانيا، يتاليا، وڭتۇستىك كورەيا، ليۆان، مالايزيا، نورۆەگيا، سەربيا جانە چەحيادان كەلگەن جۋرناليستەر بار.
«كەشە شاڭحاي ىنتىماقتاستىق ۇيىمىنىڭ استانا سامميتىندە «بەيبىتشىلىك جانە كەلىسىم سارايىندا» كوشپەندىلەر ويىندارىنا ارنالعان بۇرىش ۇيىمداستىردىق. ول جەردە ساراپشىلار، ۆولونتەرلەر ءوز پىكىرىن ايتىپ، تانىستىردى. 100 دەن استام شەتەلدىك جۋرناليست بولدى، ءبىز ۆيدەوروليك كورسەتتىك. شەتەلدىك مەيماندارعا كوشپەندىلەر ويىندارى تۋرالى كىتاپشالار تاراتتىق. بۇگىن سونىڭ جالعاسى، سىرتقى ىستەر مينيسترلىگىمەن بىرلەسىپ ۇيىمداستىرىپ جاتىرمىز»، - دەدى تۋريزم جانە سپورت ۆيتسە-ءمينيسترى سەرىك جاراسبايەۆ ب ا ق وكىلدەرىنە سۇحبات بەرە وتىرىپ.
دۇنيەجۇزىلىك كوشپەندىلەر ويىندارىنىڭ ديرەكسياسى شەتەلدىك مەيماندارعا ارنايى باعدارلاما دايىنداعان.
سونداي-اق، كوشپەندىلەر ويىندارىنىڭ ەرەكشەلىگىن جەتكىزۋ ماقساتىندا «Qazaqstan» جەڭىل اتلەتيكا كەشەنى ويىنداردىڭ ستيلىندە بەزەندىرىلىپ، ۇلتتىق سپورت تۇرلەرىنەن قويىلىمدار قويىلدى.
ەسكە سالا كەتەيىك، دۇنيەجۇزىلىك كوشپەندىلەر ويىندارىنىڭ قازاقستاندا وتەتىنى بىلتىر قازاندا بەلگىلى بولدى.
ال بيىل ناۋرىزدا العاشقى بيلەت ساتىلدى.
ايتا كەتەيىك، دۇنيەجۇزىلىك كوشپەندىلەر ويىندارى UNESCO قولداۋىمەن وتەدى.
اۆتور
داۋلەت ىزتىلەۋ
