ش ى ۇ كەڭىستىگى جاھاندىق ساۋدا دامۋىنىڭ ۇلكەن ەۋرازيالىق بەلدەۋى بولا الادى
استانا. KAZINFORM – ش ى ۇ كەڭىستىگى جاھاندىق ساۋدا دامۋىنىڭ ۇلكەن ەۋرازيالىق بەلدەۋى بولا الادى. بۇل تۋرالى ەلورداداعى تاۋەلسىزدىك سارايىندا شاڭحاي ىنتىماقتاستىق ۇيىمى ءسامميتى اياسىندا ءوتىپ جاتقان «ش ى ۇ+» كەزدەسۋىندە مەملەكەت باسشىسى قاسىم-جومارت توقايەۆ ايتتى.
«ش ى ۇ كەڭىستىگى جاھاندىق ساۋدا دامۋىنىڭ ۇلكەن ەۋرازيالىق بەلدەۋى بولۋعا قابىلەتتى. قۇرلىقتىق بىرلەستىك رەتىندەگى ءبىزدىڭ پوزيتسيامىزدى نىعايتۋ ەكونوميكالىق تۇراقتىلىق مەن گۇلدەنۋدىڭ ايتارلىقتاي فاكتورى قىزمەتىن اتقارۋى ءتيىس. قازاقستان - ەۋرازيا كولىك جۇيەسىنىڭ باستى بۋىندارىنىڭ ءبىرى سانالادى. ەلىمىز ارقىلى ازيا مەن ەۋروپا اراسىنداعى قۇرلىقتاعى ترانزيتتىك تاسىمالدىڭ 80 پايىزى جۇزەگە اسادى»، - دەدى پرەزيدەنت.
مەملەكەت باسشىسى قازاقستان «ءبىر بەلدەۋ، ءبىر جول» مەگاجوباسى مەن سولتۇستىك-وڭتۇستىك ءدالىزىنىڭ ترانسكاسپي باعىتىن تۇيىندەستىرۋ باعىتىندا بەلسەندى جۇمىس جۇرگىزىپ جاتقانىن ايتتى.
«وسىناۋ كولىك كۇرەتامىرلارىنىڭ ءتۇيىسۋى قۋاتتى مۋلتيپليكاتيۆتى اسەر بەرەدى. وسىعان بايلانىستى سەرىكتەستىك جەلى، ستراتەگيالىق پورتتار مەن لوگيستيكالىق ورتالىقتار قۇرۋ جونىندەگى باستامامىزدى ءىس جۇزىندە جۇزەگە اسىرۋعا باسا ءمان بەرەمىز»، - دەدى قاسىم-جومارت توقايەۆ.
