دزيۋدو: ەلدوس سمەتوۆ قولا جۇلدە ءۇشىن بەلدەسەدى

استانا. KAZINFORM - استانادا ءوتىپ جاتقان دزيۋدودان Qazaqstan Barysy Grand Slam جارىسىندا ەلدوس سمەتوۆ قولا جۇلدەگە تالاسۋ مۇمكىندىگىنە يە بولدى.

60 كەلى سالماقتا ەل نامىسىن قورعاپ جۇرگەن وتانداسىمىز سمەتوۆ شيرەك فينالدا رەسەيلىك رامازان ابدۋلايەۆقا ەسە جىبەرگەن بولاتىن. الايدا، جۇبانىش بەلدەسۋىندە قازاقستاندىق تاتامي شەبەرى تۇرىكمەنستاندىق ايبەك ءومىروۆتى «يپپون» ادىسىمەن جەڭىپ، جۇلدەلى ورىن الۋعا تالاساتىن بولدى.

وليمپيادا ويىندارىندا قازاقستان قورجىنىنا ەكى مارتە جۇلدە سىيلاعان سمەتوۆ سوڭعى جىلدارى بىردە-ءبىر جۇلدەگە قول جەتكىزە الماي كەلەدى.

ايتا كەتەيىك، ەلوردا تورىندە ءوتىپ جاتقان بۇل جارىستا پاريج وليمپياداسىنىڭ سوڭعى ليسەنزيالارى ساراپقا سالىنىپ جاتىر. اتالعان دوداعا الەمنىڭ 92 ەلىنەن 519 تاتامي شەبەرى قاتىسۋدا. سىنعا ءتۇسىپ جاتقان بالۋانداردىڭ قاتارىندا 3 وليمپيادا، 13 الەم چەمپيونى بار.

بۇل باسەكەنىڭ ناتيجەسىندە IJF ەرەجەلەرىنە سايكەس جارىستىڭ جەڭىمپازدارى مەن جۇلدەگەرلەرى اراسىندا الەمدىك جانە وليمپيادالىق رەيتينگىلەردە ۇپايلار بولىنەدى. اتاپ ايتقاندا، I ورىن ءۇشىن – 1000، Ⅱ ورىن ءۇشىن – 700، ال، Ⅲ ورىن ءۇشىن - 500 ۇپاي ەسەپتەلەدى.

اۆتوركۇنسۇلتان وتارباي