دينارا زاكيەۆا جالعىزباستى ەرلەردىڭ بالا اسىراپ الۋىنا قارسى شىقتى

استانا. KAZINFORM - كەشە ەلىمىزدىڭ كونستيتۋتسيالىق سوتى ەرلەر مەن ايەلدەر بالا اسىراپ العىسى كەلەتىندەردىڭ تىزىمىندە تەڭ دارەجەدە ەكەنىن جەتكىزدى. وسى ورايدا سالا ماماندارى بۇل شەشىمنىڭ قانشالىقتى ورىندى-ورىنسىز ەكەنىنە توقتالدى.

بالا قۇقىقتارى جونىندەگى ۋاكىل دينارا زاكيەۆا ۇسىنىلعان وزگەرىستەرمەن كەلىسپەيتىنىن ءبىلدىرىپ، بالالاردى رەسمي نەكەدە تۇرماعان ەر ادامداردىڭ قامقورلىعىنا بەرۋگە تىيىم سالۋ كەرەكتىگىن ايتىپ وتىر.

«مەن جانە بالا قۇقىعىن قورعاۋ كوميتەتى وسى ماسەلەنى تالقىلاۋ كەزىندە قولدانىستاعى زاڭناماعا سايكەس نەكەدە تۇرماعان ەر ادامدارعا بالا اسىراپ الۋعا سالىنعان تىيىمدى كۇشىندە قالدىرۋ قاجەت دەگەن ۇستانىمنان اينىعان جوقپىز»، - دەيدى دينارا زاكيەۆا.

ۋاكىل كونستيتۋتسيالىق سوتتىڭ شەشىمى اياسىندا زاڭناماعا وزگەرىس ەنگىزۋ كەزىندە بالالاردىڭ قاۋىپسىزدىگىن قامتاماسىز ەتۋدىڭ بارلىق تەتىگىن قاراستىرۋ قاجەتتىگىن اتاپ ءوتتى.

«بالا اسىراپ الۋعا نيەتتىلەرگە قويىلاتىن شارتتاردى قاتاڭداتۋ، سونداي-اق ولاردىڭ اسىراۋشى اتا-انا مەكتەبىندە وقىپ، ءبىلىمىن جەتىلدىرۋىن تالاپ ەتۋ كەرەك سياقتى. سونىمەن قاتار، بالانى باۋىرىنا باسقان اتا- انانى بالالاردى قولداۋ ورتالىقتارى ارقىلى سۇيەمەلدەۋ كوزىن قاراستىرعان ءجون»، - دەپ تولىقتىردى بالالار ومبۋدسمەنى.

بۇعان دەيىن قوعام قايراتكەرى ءارى كوپبالالى اكە نۇركەن حالىقبەرگەن پىكىرىن بىلدىرگەن بولاتىن.

ول بالا اسىراپ الۋ ماسەلەسىندە كەمسىتۋشىلىك نەمەسە جىنىستىق تەڭدىك ماسەلەلەرىن ەمەس، ەڭ الدىمەن بالانىڭ مۇددەسىن ەسكەرۋ كەرەك دەپ سانايدى.

ايتا كەتسەك، ق ر كونستيتۋتسيالىق سوتى نەكە جانە وتباسى تۋرالى كودەكستىڭ 91-بابى 2-تارماعىنىڭ 11-تارماقشاسىن كونستيتۋتسياعا سايكەس ەمەس دەپ تانىدى.

وسىلايشا كونستيتۋتسيالىق سوت ەرلەر مەن ايەلدەر بالا اسىراپ العىسى كەلەتىندەردىڭ تىزىمىندە تەڭ دارەجەدە ەكەندىگىن جەتكىزىپ وتىر.

اۆتور
داۋلەت ىزتىلەۋ