«ديپلوممەن-اۋىلعا» باعدارلاماسى اياسىندا 49 مىڭعا جۋىق ازامات تۇرعىن ءۇي جاعدايىن جاقسارتتى
استانا. KAZINFORM - «ديپلوممەن-اۋىلعا» باعدارلاماسىنىڭ ارقاسىندا 49 مىڭعا جۋىق ازامات تۇرعىن ءۇي جاعدايىن جاقسارتتى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر- ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان.
«ەلدىڭ بارلىق وڭىرىندە، ونىڭ ىشىندە شالعايداعى وڭىرلەردە حالىقتىڭ تۇرعىن ءۇي جاعدايلارىن جاقسارتۋ ءۇشىن مەملەكەت ءبىرقاتار ءتيىستى شارالار قابىلداۋدا. اتاپ ايتقاندا، «ديپلوممەن-اۋىلعا» باعدارلاماسى اياسىندا اۋىلداردا، ونىڭ ىشىندە شالعاي اۋدانداردا جۇمىس ىستەيتىن ماماندار (دارىگەرلەر، پەداگوگتار، مەملەكەتتىك قىزمەتشىلەر، ينجەنەرلەر جانە ت. ب. ) جىلدىق 0,01 پايىزدىق مولشەرلەمەمەن جەڭىلدىكتى كرەديت الا الادى. بۇگىنگى تاڭدا اتالعان باعدارلاما اياسىندا 49 مىڭعا جۋىق ازامات وزدەرىنىڭ تۇرعىن ءۇي جاعدايلارىن جاقسارتتى»، - دەدى رومان سكليار جاۋابىندا.
بۇدان باسقا، ونىڭ دەرەگىنشە، «وتباسى بانك» ا ق جەرگىلىكتى اتقارۋشى ورگاندارمەن بىرلەسىپ، 2017 -جىلدان باستاپ جەڭىلدەتىلگەن يپوتەكالىق كرەديتتەۋدىڭ وڭىرلىك باعدارلامالارىن ىسكە اسىرىپ جاتىر. ولار بويىنشا بۇگىنگى كۇنى 9,8 مىڭعا جۋىق ازامات جەكە تۇرعىن ءۇي ساتىپ الدى.
سونداي- اق «وتباسى بانك» ا ق اۋىلدىق جەرلەردىڭ جانە اۋدان ورتالىعى تۇرعىندارىن تۇرعىن ۇيمەن قامتاماسىز ەتۋ ماقساتىندا وسى جىلدىڭ ماۋسىم ايىنان باستاپ، «اسىل مەكەن» باعدارلاماسىن ىسكە قوستى. ونىڭ اياسىندا سالىمشىلار باستاپقى جارناسى 10 پايىز بولاتىن جىلدىق 5 پايىزدىق جەڭىلدەتىلگەن يپوتەكا الا الادى. باعدارلاما ىسكە قوسىلعان ساتتەن باستاپ بانك سالىمشىلارىنا 1,3 ميلليارد تەڭگەگە نەسيە بەرىلدى.
«وتاۋ» جانە «ناۋرىز» باعدارلامالارى اياسىندا اۋىلداردا جانە اۋدان ورتالىقتارىندا تۇرعىن ءۇي ساتىپ الاتىن ازاماتتارعا سالىنىپ جاتقان تۇرعىن ءۇي بولماعان جاعدايدا ەكىنشى نارىقتا تۇرعىن ءۇي ساتىپ الۋ مۇمكىندىگى بەرىلەتىنىن اتاپ ءوتۋ قاجەت. سونىمەن قاتار بانك جۇيە قۇراۋشى كاسىپورىندارمەن بىرلەسىپ وڭىرلەردە ولاردىڭ قىزمەتكەرلەرىن تۇرعىن ءۇي بويىنشا قولداۋ كورسەتۋگە باعىتتالعان وڭىرلىك كورپوراتيۆتىك باعدارلامالاردى ىسكە اسىرۋدا»، - دەدى ءبىرىنشى ۆيتسە- پرەمەر.
بۇعان دەيىن پرەمەر- ءمينيستردىڭ ءبىرىنشى ورىنباسارى ءماجىلىس دەپۋتاتتارىنىڭ «ناۋرىز» يپوتەكالىق باعدارلاماسىنىڭ باستاپقى جارنا مولشەرىن تومەندەتۋگە قاتىستى ساۋالىنا جاۋاپ بەرگەنىن جازعان ەدىك.
اۆتور
مارلان جيەمباي
