«ديكي ارمان» جەتەكشىلىك ەتكەن ۇيىمداسقان قىلمىستىق توپتىڭ 15 مۇشەسى ۇستالدى

استانا. KAZINFORM – ءى ءى م ۇيىمداسقان قىلمىسقا قارسى كۇرەس دەپارتامەنتى الماتى مەن شىمكەنت قالالارىندا قىلمىستىق توپتىڭ مۇشەلەرىن ۇستادى.

اراسىندا «ديكي ارمان» جەتەكشىلىك ەتكەن ۇيىمداسقان قىلمىستىق توپتىڭ 15 مۇشەسى دە بار. بۇل تۋرالى Polisia.kz. جازدى.

ىشكى ىستەر ورگاندارى سوڭعى ەكى جىلدا 140 تان استام وسىنداي توپتاردىڭ قىزمەتى توقتاتىپ، كريميناليتەتتىڭ 550 دەن استام وكىلى جاۋاپقا تارتتى.

— اسا قاۋىپتى قىلمىستىق توپتاردى، ونىڭ ىشىندە «قاڭتار وقيعاسى» كەزىندە جاپپاي تارتىپسىزدىككە قاتىسقانداردى قۇرىقتاۋ بويىنشا بەلسەندى كەزەڭ اياقتالۋدا. اعىمداعى جىلدىڭ تامىز ايىندا ۇلتتىق قاۋىپسىزدىك كوميتەتى جانە باس پروكۋراتۋرامەن بىرلەسىپ، الماتى جانە شىمكەنت قالالارىندا ءبىر ۋاقىتتا «ديكي ارماننىڭ» ۇيىمداسقان قىلمىستىق توبىنىڭ 15 ىقتيمال مۇشەسىنە قاتىستى ۇستاۋ جانە ءتىنتۋ شارالارى جۇرگىزىلدى. توپتىڭ جەتەكشىسى مەن نەگىزگى مۇشەلەرى قاماۋعا الىنعانىمەن، ونىڭ باسقا مۇشەلەرى بوستاندىقتا زاڭسىز ارەكەتتەردى جاساۋدى جالعاستىرعان. 40 تان استام ءتىنتۋ ءىس-شارالارى جۇرگىزىلىپ، اتىس، تراۆماتيكالىق جانە سۋىق قارۋ، سونداي-اق ولاردىڭ قۇقىققا قايشى قىزمەتىنىڭ وزگە دە زاتتاي دالەلدەمەلەرى تاركىلەندى. بارلىق كۇدىكتى ۋاقىتشا ۇستاۋ يزولياتورىنا قامالدى. بۇدان باسقا، ءى ءى م قىلمىستىق-اتقارۋ جۇيەسى كوميتەتىمەن بىرلەسىپ، ۇيىمداسقان قىلمىستىق توپتىڭ كوشباسشىلارى مەن نەگىزگى قاتىسۋشىلارى وتىرعان مەكەمەلەردە جەدەل جاعدايدى تۇراقسىزداندىرۋعا جول بەرمەۋ جانە ءتيىستى رەجيمدى قامتاماسىز ەتۋ جونىندە شارالار قابىلدانىپ وتىر. بۇل باعىتتاعى جۇمىس جالعاساتىن بولادى، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.