دومبىرانى ۇشاق بورتىندا الىپ ءجۇرۋ ءۇشىن جۇك تاسىمالداۋ شارتتارى وزگەرۋى مۇمكىن

استانا. KAZINFORM - كولىك مينيسترلىگى اۋە كومپانيالارىمەن بىرلەسىپ، دومبىرانى ۇشاق بورتىندا الىپ ءجۇرۋ ماسەلەسىن تالقىلاپ جاتىر. بۇل تۋرالى كولىك ۆيتسە-ءمينيسترى ءساتجان ابلاليەۆ ماجىلىستە ايتتى.

«وزدەرىڭىز بىلەسىزدەر، اۋە كومپانيالارى بورتقا قازاقتىڭ قاسيەتتى قارا دومبىراسىن كىرگىزبەيدى. بۇل ءبىزدىڭ ۇلتتىق نامىسىمىزدى قورلاۋ دەپ تۇسىنەمىز. قازاقتىڭ قاسيەتتى دومبىراسى قاتارداعى جۇك ەمەس. ءبىزدىڭ ۇلتتىق قۇندىلىعىمىز. بۇگىنگى تاڭدا قاسيەتتى دومبىراعا قالاي بولسا سولاي قاراۋ ءبىزدىڭ ۇلتتىق نامىسىمىزعا تيەدى. سوندىقتان ابدەن تايراڭداپ كەتكەن اۋە كومپانيالارىن قاشان تارتىپكە شاقىراسىزدار؟ كيەلى دومبىرانى ءاربىر ونەر وكىلى وزىمەن الىپ كىرۋى كەرەك دەپ ويلايمىن»، - دەدى ءماجىلىس دەپۋتاتى امانجول ءالتاي.

ءوز جاۋابىندا كولىك ۆيتسە-ءمينيسترى ءساتجان ابلاليەۆ اۋە كەمەلەرىندە مۋزىكالىق اسپاپتاردى تاسۋ ولاردىڭ گاباريتتەرىنە بايلانىستى ەكەنىن تاعى دا ەسكە سالدى.

«كەيبىر اسپاپتاردى قازىرگى اۋە كەمەلەرىنىڭ سورەسىنە ورنالاستىرۋ مۇمكىندىگى جوق. سوعان بايلانىستى وسىنداي سۇراقتار تۋىنداپ جاتىر. قازىرگى ۋاقىتتا اۋە كومپانيالارىمەن بىرلەسىپ، وسى شارۋانى شەشۋ بويىنشا ءتيىستى جۇمىستار جۇرگىزىلىپ جاتىر. كەرەك بولعان جاعدايدا جول جۇگىن، قول جۇگىن تاسىمالداۋ شارتتارىنا وزگەرىستەر ەنگىزۋگە دايىندالىپ جاتىرمىز. بارىنشا وسى ماسەلەنى اۋە كەمەلەرىنىڭ مۇمكىندىكتەرىنە بايلانىستى شەشۋگە تىرىسىپ جاتىرمىز»، - دەدى س. ابلاليەۆ.

ەسكە سالساق، بىلتىر ايتىسكەر اقىن ايشولپان تىلەۋتاي Fly Arystan ۇشاعىنا دومبىراسىن الىپ كىرۋگە رۇقسات بەرىلمەگەنىن الەۋمەتتىك جەلىدەگى پاراقشاسىندا جازعان ەدى. كەيىن ءماجىلىس دەپۋتاتى ۇشاقتارعا ۇلتتىق اسپاپتاردى كىرگىزبەۋگە قاتىستى اۋە كومپانيالارىنىڭ ارەكەتىن سىنعا الدى.

بۇعان دەيىن Air Astana كومپانياسىنىڭ ۆيتسە-پرەزيدەنتى الەكساندر نەبوگا ۇشاق ىشىندەگى قول جۇگى جاشىكتەرىنە كەيبىر زاتتاردى سالۋ مۇمكىن ەمەس ەكەنىن ايتتى.

اۆتور
ايجان سەرىكجان قىزى