دومبىرانىڭ ءوزىن قىتايدان ساتىپ الىپ وتىرمىز - جۇلدىز سۇلەيمەنوۆا
استانا. KAZINFORM - ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ وتىرىسىندا دەپۋتات جۇلدىز سۇلەيمەنوۆا ۇلتتىق ستاتيستيكا بيۋروسىنا قولونەرشىلەردىڭ ستاتيستيكاسىن جۇرگىزۋدى ۇسىندى.
«تاعى ءبىر كوڭىلگە قاياۋ تۇسىرەتىنى، قولونەرشىلەردىڭ سانى از. ءبىراق ولاردىڭ دا ستاتيستيكاسى كەرەك. مىسالى، قازاقستاننىڭ قاي وڭىرىندە قامشى ورەتىن قانشا ادام بار؟ دومبىرا جاسايتىن قانشا ادام بار؟ وتكەن جولى ءبىلىم جانە مادەنيەت تۋرالى زاڭدى تالقىلاعان كەزدە بىزگە مادەنيەت مينيسترلىگىنىڭ وكىلى دومبىرانى قىتايدا ساتىپ الامىز دەگەندى ايتتى. بىلاي قاراعاندا، وتە جانىڭ اۋىرادى»، - دەدى جۇلدىز سۇلەيمەنوۆا.
سونداي- اق، ول مادەني باعدارلامالاردىڭ قولونەرمەن بايلانىستى ناقتى ستاتيستيكاسىز جاسالىپ جاتقانىن ماسەلە ەتىپ كوتەردى.
«قانشا ادام دومبىرا جاسايدى، قانشا ادام قوبىز جاسايدى، قانشا ادام قامشى ورەدى، قانشا ادام ەر- توقىم جاسايدى، قانشا ادام ءتىپتى سابىن قايناتادى؟ ونىڭ ءبارى ءوزىمىزدىڭ اتا ءداستۇرىمىز عوي. سونىڭ ءبارىن ءبىلۋىمىز كەرەك قوي. وسىنداي دەرەكتەر قاجەت. ويتكەنى رۋحاني، يدەولوگيالىق باعدارلامالاردى باستاپ جاتامىز. ءبىراق سونىڭ تۇبىندە ناقتى ستاتيستيكا تۇرسا، جاقسى بولار ەدى»، - دەدى دەپۋتات.
اۆتور
ەسىمجان ناقتىباي
