دوللاردىڭ قىمباتتاۋى: ۇلتتىق بانك جاڭا تالاپ ەنگىزەدى

استانا. KAZINFORM - ۇلتتىق بانك ءتوراعاسىنىڭ ورىنباسارى ءاليا مولدابەكوۆا تەڭگەنىڭ السىرەۋىن ءتۇسىندىردى.

«سوڭعى ۋاقىتتا ىشكى جانە سىرتقى فاكتورلاردىڭ جيىنتىعى تەڭگەنىڭ السىرەۋىنە الىپ كەلدى. سىرتقى سەكتورداعى جاعداي ءالى دە كۇردەلى بولىپ وتىر. بۇل جوعارى قۇبىلمالىلىق پەن جاھاندىق ەكونوميكالىق تاۋەكەلدەردىڭ ساقتالۋىمەن بايلانىستى. ا ق ش دوللارى دامىعان جانە دامۋشى نارىقتاردىڭ ۆاليۋتالارىنا قاتىستى نىعايۋىن جالعاستىردى. DXY يندەكسى قىركۇيەك ايىنان بەرى %5,5 عا ارتىپ، 106,2 تارماققا دەيىن جەتتى. ەم ۆاليۋتالارىنىڭ يندەكسى قىركۇيەك ايىنىڭ سوڭىنان %4,1 عا تومەندەدى»، - دەدى ءاليا مولدابەكوۆا.

ونىڭ ايتۋىنشا مۇناي نارىعىندا دا پەسسيميستىك كوڭىل-كۇي بايقالىپ وتىر. بۇل الەمدىك سۇرانىستىڭ باياۋ قالپىنا كەلۋى مەن وپەك+ تاراپىنان ۇسىنىستىڭ ءوسۋى كۇتىلۋىنە بايلانىستى. سونىڭ ناتيجەسىندە مۇناي باعاسى باررەلىنە 71-72 ا ق ش دوللارى دەڭگەيىنە دەيىن تومەندەدى.

«ىشكى ۆاليۋتا نارىعىندا ەكونوميكالىق اگەنتتەر تاراپىنان شەتەل ۆاليۋتاسىنا سۇرانىستىڭ ارتۋى جانە ۆاليۋتا نارىعىندا، ونىڭ ىشىندە كۆازيمەملەكەتتىك سەكتور تاراپىنان ۇسىنىستىڭ شەكتەلۋى بايقالادى. شەتەل ۆاليۋتاسىنا سۇرانىستىڭ ءوسۋى جالپى ەكونوميكالىق بەلسەندىلىكتىڭ، ونىڭ ىشىندە سىرتقى ەكونوميكالىق بەلسەندىلىكتىڭ ارتۋىنا بايلانىستى. سونداي- اق، وعان بيۋدجەت شىعىستارىنىڭ ارتۋى مەن كۆازيمەملەكەتتىك كومپانيالاردىڭ ينفراقۇرىلىمدىق جانە ينۆەستيتسيالىق جوبالارعا شىعىندارىنىڭ ۇلعايۋى سەپ بولىپ وتىر. وسى فاكتوردىڭ بارلىعى جيىنتىعىندا يمپورتتىڭ وسۋىنە، سايكەسىنشە، شەتەل ۆاليۋتاسىنا سۇرانىستىڭ ارتۋىنا ىقپال ەتەدى. ۆاليۋتا نارىعىنداعى سۇرانىس پەن ۇسىنىس تەڭگەرىمىنىڭ بۇزىلۋى ينۆەستيتسيالىق احۋالعا كەرى اسەرىن تيگىزىپ، ينۆەستيتسيالىق جوبالاردىڭ قىمباتتاۋىنا جانە جالپى ينفلياتسيالىق قىسىمنىڭ ارتۋىنا الىپ كەلەدى. وسىعان بايلانىستى ۆاليۋتا نارىعىنداعى تەڭگەرىمدىلىكتى ارتتىرۋ ماقساتىندا كۆازيمەملەكەتتىك سەكتور سۋبەكتىلەرىنىڭ ۆاليۋتالىق تۇسىمدەرىنىڭ %50 ىن مىندەتتى تۇردە ساتۋ تالابى قايتا ەنگىزىلەدى. قازاقستان رەسپۋبليكاسى ۇكىمەتىنىڭ ءتيىستى قاۋلىسى مەن ۇلتتىق بانكتىڭ بۇيرىعى ازىرلەنىپ، جاقىن كۇندەرى قابىلدانادى»، - دەپ تولىقتىردى ۇ ب وكىلى.

ونىڭ ايتۋىنشا بۇل تالاپ 2023 -جىلدىڭ تامىزىنا دەيىن قولدانىستا بولعان، الايدا ماكروەكونوميكالىق جاعدايدىڭ وزگەرۋىنە بايلانىستى ۋاقىتشا توقتاتىلعان ەدى. سونىمەن بىرگە، بۇل تالاپ شوكتاردى باسەڭدەتۋ ءۇشىن جەدەل قولدانۋعا بولاتىن ءتيىمدى قۇرال بولىپ تابىلادى.

ەسكە سالساق، كەشەدەن بەرى دوللار قور نارىعىندا 500 تەڭگەدەن ساۋدالانىپ جاتىر.