درون، بەينەكامەرا، ليفت، مەديتسينالىق جيھاز - تۇركىستاندا قانداي كاسىپورىندار اشىلادى

تۇركىستان. KAZINFORM - تۇركىستان وبلىسىندا شەتەل كاپيتالىنىڭ قاتىسۋىمەن 910 ميلليون ا ق ش دوللارىن قۇرايتىن 6 ينۆەستيتسيالىق جوبا باستالدى. بۇل تۋرالى ءوڭىر اكىمى دارحان ساتىبالدى الەۋمەتتىك-ەكونوميكالىق دامۋ تۋرالى ەسەپتىك كەزدەسۋىندە ايتتى.

اكىمنىڭ ايتۋىنشا، تۇركىستان وبلىسىندا العاش رەت 100 گەكتار اۋماقتا «شاعىن ونەركاسىپتىك پارك» جوباسى اشىلدى. جوبا اياسىندا 308 ميلليارد تەڭگە ينۆەستيتسيا تارتىلىپ، 150 دەن استام وندىرىستىك عيمارات سالىنادى. التى مىڭعا جۋىق جاڭا جۇمىس ورنى قۇرىلادى جانە بيۋدجەتكە جىلىنا ميللياردتاعان سالىق تۇسەدى.

«بۇگىنگى تاڭدا 8 ءوندىرىس ىسكە قوسىلدى. جاڭبىرلاتىپ سۋارۋ قوندىرعىلارىن شىعاراتىن كاسىپورىندار اشىلدى. جيھاز، مۇزداتقىش جانە قۇرىلىس زاتتارىن شىعاراتىن زاۋىتتار قولدانىسقا بەرىلدى. بۇرىن تەك شەتەلدەن اكەلىنەتىن سۋ ۇنەمدەۋ تەحنولوگيالارى بۇگىندە تۇركىستاندا شىعارىلۋدا. وندىرىستىك پاركتە اشىلعان كومپانيالاردىڭ سۋ ۇنەمدەۋ تەحنولوگيالارى باسقا دا وبلىستارعا ساتىلۋدا»، - دەدى د. ساتىبالدى ورتالىق كوممۋنيكاتسيالار قىزمەتىندە وتكەن ەسەپتىك بريفينگتە.

سونداي-اق، وبلىسقا ينۆەستيتسيا تارتۋ جانە تاجىريبە الماسۋ ماقساتىندا قىتاي، رەسەي، اۋستراليا، وزبەكستان، قاتار جانە وڭتۇستىك كورەيا ەلدەرىنە تۇركىستاندىق كاسىپكەرلەردىڭ ساپارى ۇيىمداستىرىلىپ، الپاۋىت كومپانيالارمەن ماڭىزدى كەلىسسوزدەر جۇرگىزىلگەن.

ناتيجەسىندە، شەتەل كاپيتالىنىڭ قاتىسۋىمەن 910 ميلليون ا ق ش دوللارىن قۇرايتىن 6 ينۆەستيسيالىق جوبا باستالدى. اتاپ ايتقاندا: ونەركاسىپتىك جىلىجاي كەشەنى (كەلەس اۋدانى، «Ecoculture Eurasia» ج ش س II- كەزەڭ)؛ اليۋميني بۇيىمدارىن شىعارۋ (ورداباسى اۋدانى، «Central Asia Aluminium»)؛ ونەركاسىپتىك توڭازىتقىشتار شىعارۋ (ساۋران اۋدانى، «UBC Group»)؛ كاۋستيكالىق سودا، پۆح، كالتسي كاربيدى، اك-تسەمەنت شىعاراتىن زاۋىت (تۇلكىباس اۋدانى، «ساستوبە يننوۆاتسيالىق كەشەنى» ج ش س)؛ فوسفوريت كەندەرىن وڭدەۋ زاۋىتى (سوزاق اۋدانى، «سوزاق فوسفات» ج ش س) جانە مۇناي وڭدەۋ زاۋىتى (ورداباسى اۋدانى، «Standard Petrolleum» ج ش س) اشىلماق.

«ودان بولەك، قازان ايىندا تۇركىستان قالاسىنا 127 شەتەلدىك كومپانيانى شاقىرىپ، 301 ميلليارد تەڭگە كولەمىندە 35 مەموراندۋمعا قول قويدىق. وسى كەلىسىم ارقىلى درون، بەينەكامەرا، مەديتسينالىق جيھاز، تۇرمىستىق تەحنيكا وندىرەتىن كاسىپورىنداردى اشۋ جۇمىستارى باستالدى. تۇركىستاندىق زاۋىتتار ءوز ەلىمىزدى جانە ەكسپورتتى ءتۇرلى ونىممەن قامتاماسىز ەتەدى»، - دەدى دارحان ساتىبالدى.

سونداي-اق، الداعى ۋاقىتتا يندۋستريالدى ايماقتاردا تۇرمىستىق تەحنيكا، وسىمدىك مايى، گاز قوندىرعىلارى، ليفت قۇراستىرۋ، اسكەري پالاتكا، سانفايانس، سەندۆيچ پانەلى جانە سۋسىندار وندىرەتىن زاۋىتتار اشىلادى.

ايتا كەتەيىك، وبلىستاعى يندۋستريالىق ايماقتارعا قولايلى جاعداي جاساۋ ماقساتىندا يندۋستريالىق ايماقتاردا ەلەكتر ەنەرگياسى ءتاريفى 47 تەڭگەدەن 25 تەڭگەگە دەيىن ارزانداتىلدى.

اۆتور
ايجان سەرىكجان قىزى