دۇنيەجۇزىلىك كوشپەندىلەر ويىندارىندا 89 مەملەكەتتىڭ سپورتشىلارى باق سىنايدى

استانا. KAZINFORM - بيىل ەلىمىزدە 8-13-قىركۇيەك ارالىعىندا 5-دۇنيەجۇزىلىك كوشپەندىلەر ويىندارى وتەتىنى بەلگىلى. ءدۇبىرلى دوداعا الەمنىڭ 89 ەلىنەن 2,5 مىڭعا جۋىق سپورتشى قاتىسادى دەپ جوسپارلانىپ وتىر.

ويىندار 21 سپورت تۇرىنەن وتكىزىلەدى. جارتىسى ۇلتتىق سپورت تۇرلەرى بولسا، قالعانى - تۇركىتىلدەس ەلدەردىڭ ۇلتتىق ويىندارى. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن بريفينگتە ق ر تۋريزم جانە سپورت ۆيتسە-ءمينيسترى سەرىك جاراسبايەۆ ايتتى.

«قالا اكىمشىلىگىمەن كەلىسىپ، سپورتشىلارعا 32 قوناق ءۇي دايىنداپ وتىرمىز. سپورتتىق ينفراقۇرىلىمدى ايتاتىن بولساق، استانا قالاسىندا «ءبىر سىزىق» كونتسەپتسياسى قولدانىلادى. ياعني، ويىندار ءبىر كوشەدە ورنالاسقان قابانباي مەن تۇران كوشەلەرىنىڭ بويىنداعى سپورت نىساندارىندا وتەدى. «استانا-ارەنا» ستاديونىندا جارىستىڭ سالتاناتتى اشىلۋ ءراسىمى جوسپارلانىپ وتىر»، - دەدى ول.

بۇدان بولەك، كۇرەس ويىندارى ج. ۇشكەمپىروۆ اتىنداعى جەكپە-جەك سارايىندا وتەدى. جەڭىل اتلەتيكا مانەجىندە دە تارتىستى ويىندار ۇيىمداستىرىلادى دەپ كۇتىلۋدە. ال، ۇلتتىق ات سپورتى ويىندارى «قازانات» يپپودرومىندا وتكىزىلەدى. «دۋمان» قوناقۇيىندە وي قابىلەتىنە بايلانىستى سپورت تۇرلەرىنەن جارىس ۇيىمداستىرىلادى. «الاۋ» مۇز ايدىنىندا دا كۇرەس بويىنشا سايىستاردى تاماشالاۋعا بولادى.

بۇل شارا تەك سپورت سايىستارىمەن عانا شەكتەلمەي، ونىڭ اياسىندا عىلىمي-تاجىريبەلىك كونفەرەنسيا وتكىزۋ جوسپاردا بار. ول «سپورت جانە عىلىم»، «تاريح جانە مادەنيەت»، «كوشپەندىلەر ويىندارىنىڭ تاعامدارى» اتتى باعىتتار بويىنشا وتەدى.

ايتا كەتەيىك، 2 جىل بۇرىن دۇنيەجۇزىلىك كوشپەندىلەر ويىندارى تۇركيا ەلىنىڭ يزنيك قالاسىندا ۇيىمداستىرىلعان بولاتىن.

وسىعان دەيىن دۇنيەجۇزىلىك كوشپەندىلەر ويىندارىنىڭ UNESCO ۇيىمىنىڭ قولداۋىمەن وتەتىنىن جازدىق.