دۇنيەجۇزىلىك كوشپەندىلەر ويىندارىنا كەلگەن تۋريستەردەن ەل ەكونوميكاسىنا قانشا قارجى ءتۇستى
استانا. KAZINFORM - قىركۇيەك ايىندا وتكەن ءىس-شارالاردىڭ ناتيجەسىندە قازاقستانعا 2024-جىلعى 1-13-قىركۇيەك ارالىعىندا كەلگەن شەتەلدىك تۋريستەر سانى 597 مىڭعا جەتتى. ونىڭ 68 مىڭى ەلىمىزگە استانا جانە الماتى حالىقارالىق اۋەجايلارى ارقىلى، قالعاندارى اۆتو جانە تەمىرجول كولىگىمەن كەلگەن.
ق ر تۋريزم جانە سپورت مينيسترلىگى باسپا ءسوز قىزمەتىنىڭ حابارلاۋىنشا، شەتەلدىك تۋريستەر سانىنىڭ كوبەيۋىنە ىقپال ەتكەن نەگىزگى فاكتورلار - دۇنيەجۇزىلىك كوشپەندىلەر ويىنىنىڭ ءوتۋى مەن تانىمال ءانشى ديماش قۇدايبەرگەننىڭ كونسەرتى. اتالمىش شارالارعا 89 مەملەكەتتىڭ ازاماتتارى كەلگەن.
«شەتەلدىك قوناقتار نەگىزىنەن قىتاي، رەسەي، ءۇندىستان جانە گەرمانيا سىندى مەملەكەتتەردەن كەلدى. مىسالى، قىتايدان 8 مىڭنان استام، ءۇندىستاننان 6 مىڭنان استام، گەرمانيادان 4 مىڭنان استام تۋريست كەلگەن. البەتتە، بۇل دەرەكتەر قازاقستانعا تۋريستىك باعىت رەتىندە قىزىعۋشىلىقتىڭ ارتىپ كەلە جاتقانىن كورسەتەدى»، - دەپ اتاپ ءوتتى تۋريزم جانە سپورت ۆيتسە-ءمينيسترى ەرجان ەركىنبايەۆ.
ۆيتسە-ءمينيستردىڭ سوزىنشە، تۋريستەردىڭ ەداۋىر بولىگى گەرمانيا، وزبەكستان، تۇركيا، قىرعىزستان، ا ق ش جانە وڭتۇستىك كورەيادان كەلەدى.
EQonaq جۇيەسى استانادا 12,4 مىڭعا جۋىق شەتەلدىك ءتۋريستى تىركەدى. ولاردىڭ تۇرۋعا، كولىككە، تاماقتانۋعا جانە ويىن-ساۋىققا جۇمساعان جالپى شىعىندارى 15,5 ميلليون ا ق ش دوللارىن نەمەسە 7,5 ميلليارد تەڭگەنى قۇراعان. الىس شەتەلدەن كەلگەن تۋريستەردىڭ ورتاشا شىعىنى 1500 دوللاردىڭ شاماسىندا. دەمەك، دۇنيەجۇزىلىك كوشپەندىلەر ويىندارىنا كەلۋشىلەر ەل ەكونوميكاسىنا قوسىمشا 625 مىڭ ا ق ش دوللارىن قوسقان.
ايتا كەتۋ كەرەك، ەلوردانىڭ تانىمال تۋريستىك نىساندارىنا 7-13-قىركۇيەك ارالىعىندا كەلۋشىلەر سانى ارتقان. ايتالىق قازاقستاننىڭ ۇلتتىق مۋزەيى 14 مىڭنان استام ادامدى قابىلداپ، «استانا-بايتەرەك» مونۋمەنتىنە 15 مىڭعا جۋىق تۋريست، ال «نۇر-الەم» پاۆيلونىنا 10 مىڭعا جۋىق ادام كەلگەن.
حالىقارالىق دەڭگەيدەگى مادەني-سپورتتىق ءىس-شارا بولىپ تابىلاتىن كوشپەندىلەردىڭ دۇنيەجۇزىلىك ويىندارى قازاقستاننىڭ تۋريستىك يميدجىن نىعايتۋ ءۇشىن ەلەۋلى ۇلەس قوستى. كوشپەندىلەر ويىنىنىڭ ۇيىمداستىرۋ كوميتەتىنىڭ مالىمەتىنشە، ەتنواۋىل مەن ويىنداردىڭ ءوزىن كورۋگە 250 مىڭنان استاپ ادام كەلگەن.
