دۇنيەجۇزىلىك كوشپەندىلەر ويىندارى: سپورتشىلارعا قانداي اس ءمازىرى ۇسىنىلادى

استانا. KAZINFORM - دۇنيەجۇزىلىك كوشپەندىلەر ويىنىنىڭ باستالۋىنا از ۋاقىت قالدى. بۇگىندە ۇيىمداستىرۋشىلار سپورتشىلاردى كۇتىپ الۋدان باستاپ شىعارىپ سالۋعا دەيىنگى ازىرلىكتى مىقتاپ قولعا العان. ءبىزدى قىزىقتىرعانى: سپورتشىلار قانداي تاماق جەيدى ەكەن؟

بۇل ساۋالدى ۇيىمداستىرۋشىلارعا قويعان ەدىك. ولار سپورتشىلار ايالدايتىن قوناق ۇيلەردە 3 مەزگىل تاماقتاندىرىلاتىنىن جەتكىزدى. ايتا كەتەيىك، سپورتشىلارعا 20 قوناق ءۇي قاراستىرىلعان.

«سپورتشىلار استىڭ قۇنارلىلىعىنا ەرەكشە ءمان بەرەتىنى بەلگىلى. ءبىر كۇندىك استىڭ قۋاتتىلىعى 4 مىڭ كيلوكالوريادان كەم بولماۋى ءتيىس. بۇل رەتتە، مەيماندارعا 5 ءتۇرلى اس ءمازىرى ۇسىنىلىپ وتىر. ولاردىڭ قاتارىندا قازاق، شىعىس، ەۋروپالىق، جەرورتا تەڭىزى جانە ۆەگەتارياندارعا ارنالعان ارنايى اس ءمازىرى بار. بوتقا جەگىسى كەلەتىندەر دە بولىپ قالادى-اۋ دەگەن ويمەن ءداندى داقىلداردى سۋدا قايناتىپ جاسالاتىن تاعامداردى دا نازاردا ۇستاپ وتىرمىز»، - دەيدى V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسى تاماقتاندىرۋ جانە ورنالاستىرۋ ءبولىمىنىڭ باسشىسى ءلاززات باتىربەكوۆا.

ايتپاقشى، ءار داستارحاندا قازاقتىڭ ۇلتتىق تاعامدارى بولاتىنىن اتاپ وتكەن ءجون. وسىلايشا، شەتەلدىك سپورتشىلارعا قازاقتىڭ ۇلتتىق اس ءمازىرى دارىپتەلمەك.

ۆولونتەرلەر مەن تورەشىلەردى تاماقتاندىرۋ دا نازاردان تىس قالماق ەمەس.

ەستەرىڭىزگە سالساق، بۇعان دەيىن شەتەلدىك سپورتشىلار تۇلپارلارىن استاناعا قالاي اكەلەتىنىن زەرتتەپ كورگەن ەدىك.

اۆتور
ورالحان قوجانوۆ