دۇنيەجۇزىلىك كوشپەندىلەر ويىندارى: اشىلۋ سالتاناتىنداعى تاريحي عالامات
استانا. KAZINFORM - ءدۇبىرلى دودانىڭ اشىلۋ سالتاناتى كوپتىڭ كوڭىلىنەن شىققانى انىق. بۇل بايراقتى باسەكەنى تۇڭعىش رەت ۇيىمداستىرىپ وتىرعاندىقتان «شەتەلدىك مەيماندارعا ۇنادى ما ەكەن؟» دەپ قوبالجىعانىمىز دا جاسىرىن ەمەس. بايقاۋىمىزشا، شەتەل سپورتشىلارى ءوز الدىنا، اشىلۋ سالتاناتىن تەلەديداردان تاماشالاعان الىس-جاقىنداعى كورەرمەندەر جوعارى باعا بەرىپ وتىر.
اسىرەسە، كوشپەندى حالىقتاردىڭ تاريحىنان سىر شەرتەتىن كورىنىستەر ەرەكشە اسەر ەتىپ، كورەرمەندەر وتكەن عاسىرلارعا ساپار شەككەنىن العا تارتۋدا. ەدىل پاتشا، تۇمار پاتشايىم، جوشى حان داۋىرىندەگى تاريحي ساتتەر تارتىمدى شىققانىن اتاپ وتكەن ءجون. وسى رەتتە، بۇل شارۋاعا جاۋاپتى بولعان ق ر مادەنيەت جانە اقپارات مينيسترلىگىنىڭ ماماندارىنا حابارلاستىق. ونداعىلار «التىن جاۋىنگەرلەر شەرۋى» دەپ اتالعان ءبولىمنىڭ ماڭىزدىلىعىن تارقاتىپ بەردى.
«كوشپەندىلەردىڭ ەڭ ۇلكەن جاڭالىعى - دوڭگەلەكتى ويلاپ تابۋى. سول ارقىلى نومادتار جىلدامدىعىن ارتتىردى، ەل مەن ەلدىڭ، جەر مەن جەردىڭ اراسىن قوستى. ەدىل پاتشا باستاعان عۇندار، تۇمار پاتشايىم باستاعان ساقتار ءوز داۋرىندە لايىقتى ءومىر ءسۇرىپ قانا قويماي، كەيىنگى ۇرپاققا دا ۇلگى بولىپ قالدى. تەمىر مەن قولا، التىن مەن كۇمىس ءوندىرىس باستالعان سوڭ كوشپەندىلەردىڭ قارۋ-جاراعى، مۇلكى، ءتىپتى قولونەرى دە وزگەردى. سكيفتەردەن قالعان اڭدىق ستيلدەگى بۇيىمدار - سونىڭ دالەلى. ارينە، تاريحتىڭ ءبارىن از ۋاقىتتىڭ ىشىندە بەينەلەۋ مۇمكىن ەمەس. دەسە دە، كورەرمەندەردىڭ قويىلىمنان ەرەكشە اسەر العانىن اڭعاردىق»، - دەدى مينيسترلىكتىڭ باسپا ءسوز قىزمەتى.
اشىلۋ سالتاناتىنداعى بەسىنشى ءبولىم «جوشى حان ۇلىسى (التىن وردا)» دەپ اتالعان. قويىلىمدى تاماشالاعان ءار كورەرمەن رۋح الىپ، جىگەرلەنە تۇسكەنى راس.
«جوشى ۇلىسى - التايدان قازىرگى ەۋروپانىڭ ورتالىعىنا دەيىن سوزىلىپ جاتقان كوشپەلىلەردىڭ بىرەگەي مەملەكەتى. بۇل كوپتەگەن ساياسي وزگەرىستەر اكەلگەن، وركەنيەتتەردى بىرىكتىرىپ، الەمدىك مادەنيەت پەن ەكونوميكانىڭ دامۋىنا سەرپىن بەرگەن بۇكىل ادامزاتتىڭ تاريحى. سول سەبەپتى ءدۇبىرلى دودانىڭ اشىلۋ سالتاناتىندا جوشى ۇلىسى جايلى ارنايى قويىلىم دايىنداۋ ەرەكشە ماڭىزى زور دۇنيە بولدى. بۇل - كوشپەندىلەر تاريحىنداعى قايتالانباس ءداۋىر»، - دەلىنگەن مينيسترلىكتىڭ اگەنتتىك تىلشىسىنە بەرگەن جاۋابىندا.
ايتا كەتەيىك، دۇنيەجۇزىلىك كوشپەندىلەر ويىندارىنىڭ اشىلۋ سالتاناتىن وتاندىق تەلەارنالاردان بولەك، الەمنىڭ 19 تەلەارناسى كورسەتتى. كوشپەندىلەر ويىندارى تاريحىندا مۇنداي حالىقارالىق دەڭگەيدە اۋقىمدى تەلەحابار تاراتۋ ءبىرىنشى رەت قولعا الىنعانىن اتاپ وتكەن ءجون.
اشىلۋ سالتاناتى ءداستۇرلى تۇردە سپورت دەلەگاتسيالارىنىڭ شەرۋىنەن باستالىپ، تاڭعاجايىپ شوۋعا ۇلاستى. كورەرمەندەرگە زاماناۋي ساحنالىق تەحنولوگيالار مەن مۋلتيمەديالىق ديزاين قولدانىلعان 2 ساعاتتىق اۋقىمدى مۋزىكالىق-تەاترلاندىرىلعان قويىلىم ۇسىنىلدى. الەم كوز تىككەن اۋقىمدى شاراعا 3000-عا جۋىق ونەرپاز قاتىستى.
اۆتور
ورالحان قوجانوۆ
