دۇنيە ديدارىنداعى ديماش: ۇلتتىق مۋزەيدە ءانشى شىعارماشىلىعىنا ارنالعان كورمە اشىلادى

استانا. KAZINFORM - مادەنيەت جانە اقپارات مينيسترلىگىنىڭ قولداۋىمەن ۇلتتىق مۋزەيدە قازاقستاننىڭ حالىق ءارتىسى، كومپوزيتور جانە مۋلتياسپاپشى ديماش قۇدايبەرگەننىڭ شىعارماشىلىعىنا ارنالعان «دۇنيە ديدارىنداعى ديماش» اتتى كورمەنىڭ اشىلۋ ءراسىمى وتەدى.

كورمە حالىقتىڭ سۇيىكتىسى ديماش قۇدايبەرگەننىڭ استاناداعى كونسەرتى اياسىندا ءارتىستىڭ شىعارماشىلىق جولى مەن جەتىستىكتەرىن كورسەتەتىن بىرەگەي مادەني كەڭىستىك قۇرۋعا باعىتتالعان.

«دۇنيە ديدارىنداعى ديماش» كورمەسىنە قازاق جانىنىڭ بولمىسىن بەينەلەيتىن، ونىڭ قايتالانباس ءۇنىن قالىپتاستىرعان، ومىرىندەگى ەلەۋلى وقيعالار تۋرالى حابار بەرەتىن قۇندىلىقتار، تانىمال تۇلعالار مەن كوپتەگەن جانكۇيەرلەردىڭ سىيلىقتارى ۇسىنىلادى.

كورمە مازمۇنى جاعىنان ءبىر-بىرىمەن بايلانىستى بولىمدەردەن قۇرالعان:

«شابىت كوزدەرى» - ءارتىستىڭ ءومىربايانى، وسكەن ورتاسى، بالالىق شاعى مەن شىعارماشىلىق جولىن كورسەتەتىن زاتتار (فوتوسۋرەتتەر، جەكەلەگەن زاتتار)؛
«داڭققا اپارار جول» - كاسىبي ءبىلىم جولىندا العان ديپلومدارى، رەسپۋبليكالىق، حالىقارالىق بايقاۋلاردا يەلەنگەن ماراپاتتارى جانە باسقا زاتتار؛
«جانكۇيەرلەر ماحابباتى» - ءارتىستىڭ جانكۇيەرلەرى تارتۋ ەتكەن سىيلىقتار؛
«ۇلت مادەنيەتىنىڭ جارشىسى» - الەمدىك ارەنادا ۇلتتىق مادەنيەت پەن برەندتىڭ تانىلۋىنا ىقپال ەتەتىن ديماشتىڭ زاتتارى(ۇلتتىق مۋزىكالىق اسپاپتار، ۇلتتىق كوستيۋمدەرى، باسپا ماتەريالدارى). 
ۇلتتىق مۋزەي مالىمەتىنشە، 12-قىركۇيەك كۇنى ساعات 15:00-دە اشىلاتىن كورمە 6-قازانعا دەيىن جالعاسادى.

اۆتور
مارلان جيەمباي