«دۇنيە ديدارىنداعى ديماش»: ءانشىنىڭ تۋعان جەرىندەگى كورمە قاڭتاردا دا جالعاسادى
اقتوبە. KAZINFORM - ءانشىنىڭ «دۇنيە ديدارىنداعى ديماش» اتتى كورمەسى قاڭتاردىڭ 15 ىنە دەيىن جالعاسادى. بۇگىنگە دەيىن كورمەنى 4 مىڭنان استام ادام كەلىپ، تاماشالادى.
اقتوبە وبلىستىق تاريحي-ولكەتانۋ مۋزەيى «دۇنيە ديدارىنداعى ديماش» اتتى كورمەنىڭ ءالى دە سوزىلاتىنىن حابارلادى.
- وڭىرگە كەلگەن شەتەلدىكتەر مۋزەيدەگى جادىگەرلەرمەن تانىسسا مىندەتتى تۇردە ديماش قۇدايبەرگەننىڭ دە كورمەسىن تاماشالايدى. سونىمەن بىرگە تاياۋدا رەسەيدەن تىڭدارمانى ارنايى كەلىپ، ءانشىنىڭ ءوزى تۇتىنعان، سىيعا بەرىلگەن زاتتارىن قارادى. ول 2019-جىلى استانادا وتكەن كونسەرتكە بارعان ەكەن. ءوزى نوۆوترويتسكتە تۇرادى. شەكارا جاقىن بولعان سوڭ كەلىپ، ءوزى بەرگەن سىيلىقتى ەكسپوناتتار ىشىنەن كوردى. بۇل دا قۇرمەت، - دەدى اقتوبە وبلىستىق تاريحي-ولكەتانۋ مۋزەيىنىڭ عىلىمي قىزمەتكەرى نۇرساۋلە سانسىزباي.
ايتا كەتەيىك، «دۇنيە ديدارىنداعى ديماش» اتتى كورمەسى 24-قازان كۇنى اشىلدى. مۇندا ءانشى ديماش قۇدايبەرگەننىڭ بالا كۇنىندە جاتقان بەسىگى، وتباسىنىڭ فوتوالبومى مەن ماراپاتتارىن، وزگە دە ەكسپوناتتاردى تاماشالاۋعا بولادى.
