دۇكەن اشام دەگەندەرگە مەملەكەت اقشا بەرەدى: ونى قالاي الۋعا بولادى

استانا. قازاقپارات - Ulysmedia.kz تىلشىسىنە ساۋدا جانە ينتەگراتسيا مينيسترلىگى ساۋدا كوميتەتىنىڭ باسپا ءسوز حاتشىسى تويگۇل جۇبانيسوۆا دۇكەن اشام دەگەن ازاماتتارعا مەملەكەت قالاي كومەك بەرەتىنىن ءتۇسىندىرىپ بەردى.

تالاپ قانداي

- بۇل جەردە باستى تالاپ - دۇكەندى كاسىپكەر ءوزى سالۋى كەرەك. ماسەلەن، دايىن دۇكەندى ساتىپ الاتىندارعا مەملەكەتتەن كومەك بەرىلمەيدى. ۇلكەن مەگاپوليس - استانا، الماتى مەن شىمكەنت قالاسىنىڭ ازاماتتارى بۇل كومەكتى الا المايدى. سەبەبى وڭىرلەردى ساۋدا سالاسىن دامىتۋعا ءمان بەرىلىپ جاتىر، - دەيدى ول.

تويگۇل جۇباسينوۆانىڭ سوزىنشە، دۇكەن سالام دەگەن ازاماتتار ول ءۇشىن اۋەلى بانككە بارادى. ەگەر بانك نەسيە بەرۋگە كەلىسسە، «دامۋ» قارجىلىق وپەراتورى وسى باعدارلاما ارقىلى كاسىپكەر العان نەسيەنىڭ پايىزدىق مولشەرلەمەسىن جابادى.

- مىسالى، ەكىنشى دەڭگەيلى بانك كاسىپكەرگە 18-19 پايىزبەن بەرسە، وسى باعدارلاما بويىنشا 10,78 پايىزىن مەملەكەت تولەيدى. ار جاعىنداعى 8 پايىزىن كاسىپكەردىڭ ءوزى تولەيدى، - دەيدى كوميتەت وكىلى.

بيىل قازان مەن جەلتوقسان ارالىعىندا بۇل 4 ءتۇرلى ماقساتى بار باعدارلاماعا 4 ميلليارد تەڭگە بولىنەدى. 2025 -جىلى بۇل باعىتتا 5,6 ميلليارد تەڭگە بولسە، ودان كەيىن ول كومەكتى 10 ميلليارد تەڭگەگە دەيىن جەتكىزۋ كوزدەلگەن.

دۇكەن اشام دەگەندەرگە كومەك

ەسكە سالا كەتەيىك، بۇعان دەيىن ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ايدار ابىلدابەكوۆ مەملەكەت ىشكى ساۋداداعى جەكە كاسىپكەرلەرگە قولداۋ كورسەتۋ ءۇشىن رەسپۋبليكالىق بيۋدجەتتەن 2024 -جىلى 4 ميلليارد تەڭگە ءبولۋ تۋرالى شەشىم قابىلداعانىن ءمالىم ەتكەن ەدى. مەملەكەت وسىلايشا، ىشكى ساۋدا سۋبەكتىلەرىن جاڭارتۋ ءۇشىن مەملەكەتتىك قولداۋ شارالارىن كورسەتەدى. مەملەكەتتىك قولداۋ شارالارى 2 ءتۇرلى ءتاسىل ارقىلى كورسەتىلەدى. بىرىنشىدەن، نەسيە مولشەرلەمەسىن سۋبسيديالاۋ، ەكىنشىسى - نەسيەگە كەپىل بەرۋ. جالپى مەملەكەتتىك قولداۋ شارالارى 4 ءتۇرلى ماقساتقا باعىتتالعان. ولار: ساۋدا بازارلارىن جاڭعىرۋ ءۇشىن، ساۋدا وبەكتىلەرىن سالۋ، كەڭەيتۋ، رەكونسترۋكتسيالاۋ ءۇشىن، ءۇي جانىنان دۇكەن سالۋ ءۇشىن، وسى سالادا IT باعدارلامالار جاساۋ ءۇشىن بەرىلەدى.

بۇل باعدارلاماعا استانا، الماتى، شىمكەنت قالالارى جانە ەلدەگى ويىن-ساۋىق ورتالىقتارى قاتىسا المايدى.

سونداي-اق باعدارلامانىڭ شارتى بويىنشا ساۋدا نىساندارىنا قاتىستى جوبالارىن وبلىس ورتالىقتارىندا جۇزەگە اسىراتىن جەكە كاسىپكەرگە بەرىلەتىن سوما 3 ميلليارد تەڭگەدەن، ال، جوبانى مونوقالالاردا نەمەسە اۋىلدىق ەلدى مەكەندەردە جۇزەگە اسىراتىندار ءۇشىن بەرىلەتىن سوما 1,5 ميلليارد تەڭگەدەن اسپايدى.