دجو بايدەن يزرايل مەن حاماس اراسىنداعى ءبىتىم مەرزىمى ۇزارتىلاتىنىنان ءۇمىتتى
ا ق ش پرەزيدەنتى دجو بايدەن يزرايل مەن حاماس ۇيىمىنىڭ سوعىستى ۋاقىتشا توقتاتۋ شەشىمىن قولداۋعا شاقىردى. Kazinform اگەنتتىگىنىڭ ءتىلشىسى بۇل تۋرالى اق ۇيگە سىلتەمە جاساپ حابارلايدى.
دجو بايدەن بولاشاقتا ا ق ش «تاياۋ شىعىستاعى زورلىق- زومبىلىق تسيكلىنا» نۇكتە قويۋى ءتيىس ەكەنىن اتاپ ءوتتى.
«ءبىز يزرايلدىكتەر مەن پالەستينالىقتاردىڭ تەڭ بوستاندىق پەن قادىر- قاسيەتكە يە ەكى مەملەكەت تۋرالى كەلىسىم اياسىندا ءومىر سۇرە الاتىن شەشىمگە ۇمتىلۋداعى جىگەرىمىزدى راستاۋىمىز كەرەك. ەكى حالىققا - ەكى مەملەكەت. بۇل قازىر بۇرىنعىدان دا ماڭىزدى»، - دەدى دجو بايدەن.
ا ق ش باسشىسى سوعىس قيمىلدارىن توقتاتۋدى ەكى سەبەپ بويىنشا دايەكتى تۇردە العا تارتقانىن ايتتى: گازاعا گۋمانيتارلىق كومەك جەتكىزۋدى كەڭەيتۋ ءۇشىن جانە تۇتقىنداردى بوساتۋعا كومەكتەسۋ ءۇشىن.
سوڭعى بىرنەشە اپتا ىشىندە دجو بايدەن سوعىستى ۋاقىتشا توقتاتۋ ءۇشىن كاتار ءامىرى، مىسىر پرەزيدەنتى جانە يزرايلدىڭ پرەمەر- مينيسترىمەن بىرنەشە رەت اڭگىمەلەستى. ا ق ش پرەزيدەنتى وسى ەلدەردىڭ كوشباسشىلارىنا بۇل ماقساتقا قول جەتكىزۋدەگى سەرىكتەستىگى ءۇشىن العىسىن ءبىلدىردى.
سوعىس ارەكەتتەرىن توقتاتۋ زارداپ شەككەندەرگە گۋمانيتارلىق كومەك جەتكىزۋگە مۇمكىندىك بەرىپ وتىر. مىسىردان پالەستينالىقتارعا ازىق- تۇلىك، ءدارى- دارمەك، جانارماي جانە گاز جەتكىزۋ ءۇشىن باقىلاۋ- وتكىزۋ پۋنكتىنە 200 دەن استام جۇك كولىگى جىبەرىلدى.
بايدەننىڭ اتاپ وتۋىنشە، الداعى كۇندەرى ول بۇكىل تاياۋ شىعىستاعى كوشباسشىلارمەن ءوزارا ارەكەتتەستىكتى جالعاستىرادى. مۇنداعى ونىڭ ماقساتى - ايماقتا يەۆرەي، مۇسىلمان، حريستيان، يزرايلدىك، پالەستينالىق، ارابتىڭ ءار بالاسى جەردى ەركىن باساتىنداي بەيبىتشىلىكتى قالپىنا كەلتىرۋ.
كاتار ءس ى م حابارلاماسىنا سايكەس، گازاداعى سوعىس قيمىلدارىن توقتاتۋ رەجيمى 24- قاراشا تاڭىندا باستالدى. كەشە يزرايل مەن حاماس ءبىتىمدى تاعى ەكى كۇنگە سوزۋ تۋرالى كەلىستى.
