دجو بايدەن گازادا التى اپتالىق بىتىمگە كەلۋگە شاقىردى
استانا. KAZINFORM - ا ق ش پرەزيدەنتى يزرايل مەن حاماس-تىڭ گازا سەكتورىنداعى سوعىس قيمىلدارىنا التى اپتالىق ءۇزىلىس جاساۋعا شاقىردى.
بايدەننىڭ پىكىرىنشە، بۇل ۇزاق مەرزىمدى بەيبىتشىلىك جولىنداعى العاشقى قادام بولۋى مۇمكىن، دەپ حابارلايدى DW اقپارات اگەنتتىگى.
امەريكالىق كوشباسشىنىڭ بۇل مالىمدەمەسى دۇيسەنبى، 12-اقپان كۇنى ۆاشينگتوندا يوردانيا كورولى ابداللا II مەن كەلىسسوزدەردەن كەيىن جاسالدى.
بايدەننىڭ ايتۋىنشا، ا ق ش ازىرلەپ جاتقان گازا سەكتورىنداعى التى اپتالىق ءبىتىم ءبىر جاعىنان يزرايلدىك كەپىلگە الىنعانداردى بوساتۋعا كومەكتەسسە، ەكىنشى جاعىنان شايقاس بولعان ايماقتاعى بەيبىت تۇرعىندارعا جەتكىزىلەتىن گۋمانيتارلىق كومەك كولەمىن ۇلعايتۋى مۇمكىن. ا ق ش پرەزيدەنتىنىڭ ايتۋىنشا، مۇنداي ۋاقىتشا ءبىتىم ايماقتا تۇراقتى بەيبىتشىلىك ورناتۋ جولىنداعى العاشقى قادام بولۋى مۇمكىن.
ابدۋللا II ءوز كەزەگىندە گازا سەكتورىنداعى سوعىستى دەرەۋ توقتاتۋعا شاقىردى.
«ءبىز مۇنىڭ جالعاسۋىنا جول بەرە المايمىز. بىزگە قازىر ۇزاق مەرزىمدى اتىستى توقتاتۋ كەرەك. سوعىس اياقتالۋى كەرەك»، - دەدى يوردانيا. مونارحى. ول سوعىستىڭ جالعاسۋى گۋمانيتارلىق اپاتقا قاۋىپ توندىرەتىنىن قوسىپ ءوتتى. سونداي- اق II ابدۋللا پالەستينانىڭ ەكى ايماعى - يوردان وزەنىنىڭ باتىس جاعالاۋى مەن گازا سەكتورىن ساياسي جاعىنان ءبولۋدى «قابىلداۋعا بولمايتىن» دەپ ايتتى.
